Sigurður Páll Jónsson, þingmaður Miðflokksins í Norðvesturkjördæmi, segir að hann sé þingmaðurinn sem Ríkisútvarpið gleymdi. Sigurður skrifar pistil um málið í Morgunblaðið í dag en tilefnið er svar Lilju Alfreðsdóttur, mennta- og menningarmálaráðherra, við fyrirspurn sem Inga Sæland lagði fram ekki alls fyrir löngu.
Í fyrirspurn sinni spurði hún út í umfjöllun RÚV um ákveðna stjórnmálamenn, en í ljós kom að Sigurður Páll er sá þingmaður sem sjaldnast hefur ratað í fréttir RÚV frá ársbyrjun 2018 til janúarloka 2021. Yfirskrift pistils Sigurðar er einmitt þessi: Ég er þingmaðurinn sem Ríkisútvarpið gleymdi.
Í grein sinni reynir Sigurður Páll að bæta fyrir þetta og nefnir nokkur af sínum baráttumálum og áhugamálum.
„Ég er rafvirki frá Iðnskólanum í Reykjavík og hef skipstjórnar- og vélavarðarréttindi á 30 tonna skip. Ég hef unnið sem bifreiðarstjóri, rafvirki og sjómaður. Ég hef verið með eigin trilluútgerð og finnst stundum gaman að titla mig sem útgerðarmann. Það er kannski svolítið mikið í lagt en mínar bestu stundir eru þegar ég sigli minn sjó, gjarnan með syni mínum og við komum gjarnan með nokkra fiska að landi. Ég geri út frá Stykkishólmi sem mér finnst fallegasti bær landsins,“ segir hann.
Hann segir að áhugamálin séu mörg; körfubolti, kórastarf og Lions-klúbburinn sem hann er í. Hann nefnir að hann eigi sæti í atvinnuveganefnd og eyði drjúgum tíma á fundum þar.
„Meðal annars samtals um fimm tímum í vikunni þegar kom í ljós að Ríkisútvarpið vissi ekki að ég væri til. Og hvað gerði ég annað í þessari viku? Jú, ég átti um það bil 40 símtöl og samtöl við fólk í mínu kjördæmi sem hefur áhyggjur og áhuga á alls konar málefnum og sat tvo þingflokksfundi með félögum mínum í Miðflokknum.“
Sigurður Páll segir að hann hafi gaman af störfum sínum á Alþingi þótt hann sé algerlega ótruflaður af Ríkisútvarpinu.
„Það er kannski ekki svo slæmt fyrir mig persónulega en mér finnst stundum eins og þetta lýsi líka afstöðu Ríkisútvarpsins til kjósenda minna. Það finnst mér miður af því það á nú að heita útvarp allra landsmanna.“
