Sigurður Ingi Jóhannsson, innviðaráðherra, biðst afsökunar á ummælum sem hann hafði um Vigdísi Häsler f framkvæmdastjóra Bændasamtaka á Bændaþingi á fimmtudaginn.
Á þinginu stóð til að taka mynd þar sem þingmenn áttu að bera Vigdísi í planka er Sigurður sagður hafa sagst ekki vilja taka þátt í þessu „með þessari svörtu“. Aðstoðarmaður Sigurðar Inga þvertók fyrir að hann hafi notað þessi orð en Vigdís segist vita hvað var sagt en Vigdís og starfsmenn Bændasamtakanna hafa sagt að þau vita hvað þau heyrðu en Vigdís er dökk á hörund og á ættir að rekja til Indónesíu.
„Ég er alinn upp við það og það er mín lífsskoðun að allir séu jafnir. Þess vegna hef ég tamið mér að koma jafnt fram við alla. En mér verður á eins og öðrum. Það þykir mér miður. Í kvöldverðarboði Framsóknar fyrir fulltrúa á Búnaðarþingi síðastliðið fimmtudagskvöld, lét ég óviðurkvæmileg orð falla í garð framkvæmdastjóra Bændasamtakanna. Á þeim orðum biðst ég innilegrar afsökunar. Í lífinu er maður alltaf að læra á sjálfan sig. Sárt er þó að sá lærdómur bitni á tilfinningum annarra,“ skrifar Sigurður Ingi á Facebook rétt í þessu.
Vigdís skrifaði færslu fyrr í dag þar sem hún sagði ummælin hafi verið meiðandi og að hún ætlaði að standa með sjálfum sér.
„Það er særandi þegar reynt er að gera lítið úr upplifun minni og þegar beinlínis rangar skýringar eru notaðar við það. Ég stend með sjálfri mér þegar kemur að þessu, ég veit hvað ég heyrði, ég veit hvað var sagt. Ég neita að bera ábyrgð á þeim orðum sem ráðherrann viðhafði í minn garð. Duldir fordómar eru gríðarlegt samfélagsmein og grassera á öllum stigum samfélagsins. Þeir smætta verk einstaklinga og gjörðir niður í lit eða kyn,“ sagði Vigdís meðal annars.
