Sigurborg Ósk Haraldsdóttir, borgarfulltrúi og formaður skipulags- og samgönguráðs, var brugðið í morgun. Minnstu munaði að bifreið hefði verið ekið á sex ára son hennar.
Sigurborg segir frá þessu á Twitter.
„Var að ganga með 6 ára strumpinum mínum í skólann. Bíll byrjar að bakka úr innkeyrslu þegar við göngum eftir gangstéttinni. Ég þurfti að öskra á son minn til að bjarga honum. Ekki í fyrsta skipti sem við lendum í þessu. Þetta gerist í öllu þéttbýli, alla daga,“ segir Sigurborg sem leggur til ákveðin atriði sem gætu komið í veg fyrir skelfileg slys.
„Getum við sameinast um að bakka alltaf inn í innkeyrslur og stæði? Þannig að áður en ökumaðurinn leggur af stað sér hann alla sem eru á gangi umhverfis bílinn.“
Sigurborg segir að fleiri endurskinsmerki hefðu ekki bjargað neinu í þessu tilviki.
„Ábyrgðin á ekki að vera á þeim sem gengur um borgina. Hún á að vera á ökumanninum sem ekur um á nokkra tonna járnfarartæki sem getur keyrt yfir börn án þess að tekið sé eftir því.“
Var að ganga með 6 ára strumpinum mínum í skólann. Bíll byrjar að bakka úr innkeyrslu þegar við göngum eftir gangstéttinni. Ég þurfti að öskra á son minn til að bjarga honum. Ekki í fyrsta skipti sem við lendum í þessu. Þetta gerist í öllu þéttbýli, alla daga.
— Sigurborg Ósk Haraldsdóttir (@SigurborgOsk) November 18, 2020
