Sigurbjörg Erla Egilsdóttir, bæjarfulltrúi Pírata í Kópavogi, bókaði mótmæli við ráðningarsamning Ásdísar Kristjánsdóttur, bæjarstjóra Kópavogs, á fundi bæjarstjórnar í gær.
„Í ráðningarsamningi nýs bæjarstjóra Kópavogs í boði xB og xD er kveðið á um fasta mánaðarlega greiðslu vegna aksturs sem nemur 1250 kílómetrum (að upphæð 158.750 króna, skattfrjálst) í hverjum mánuði út kjörtímabilið. Þetta er ROSALEGA mikill akstur og engin rök fyrir slíku ákvæði. Þetta jafngildir um 60 kílómetra akstri hvern einasta vinnudag. Hvern. Einasta. Vinnudag,“ skrifar Sigurbjörg Erla í Facebook.
„Það er engin þörf fyrir bæjarstjóra Kópavogs til að keyra svona mikið vegna starfa sinna, en þess má jafnframt geta að Kópavogsbær á og rekur nokkra rafbíla sem standa starfsfólki stjórnsýslunnar til boða þegar það þarf að fara úr húsi til að reka erindi.
Ákvæðið stingur jafnframt í stúf við bæði yfirmarkmið Kópavogsbæjar, Heimsmarkmið sameinuðu þjóðanna, og málefnasamning meirihlutans þar sem fjallað er um mikilvægi þess að vanda vel til verka þegar kemur að umhverfismálum, og að vistvænir ferðamátar og virðing gagnvart umhverfinu leiki þar lykilhlutverk. Það að bæjarstjóri Kópavogs fyrirhugi að aka 60.000 kílómetra á kjörtímabilinu setur ekki gott fordæmi,“ skrifar Sigurbjörg.
Hún segir síðan að það skal engan undra að í umræddum málefnasamningi Framsóknar og Sjálfstæðisflokks sé ekki orði minnst á Borgarlínu, strætó eða almenningssamgöngur.
