Sigurbjörg Erla Egilsdóttir, bæjarfulltrúi Pírata í Kópavogi, er allt annað en sátt með auglýsingar Framsóknarflokksins í Lindunum í Kópavogi.
„Tvö gígantísk skilti birtust nýlega við Skógarlind í Kópavogi þar sem Framsóknarflokkurinn auglýsir framboð sitt fyrir kosningarnar. Það eru sex dagar síðan ég fékk staðfest frá umhverfissviði bæjarins að hvorki byggingardeild né skipulagsdeild hafa fjallað um, hvað þá gefið leyfi fyrir, skiltum á þessum stað. Sama dag spurði ég hvort það stæði þá ekki til að krefja lóðarhafa um að fjarlægja skiltin en hef engin svör fengið þrátt fyrir ítrekanir,“ skrifar Sigurbjörg á Facebook.
„Í haust fyrir þingkosningarnar hengdi stuðningsaðili annars framboðs (sem er í minnihluta í Kópavogi) skilti utan á grindverkið hjá sér en þegar í ljós kom að slíkt var leyfisskylt var viðkomandi gert að fjarlægja auglýsingarnar samdægurs. Þurfa flokkarnir sem sitja í meirihluta í bæjarstjórn Kópavogs ekki að lúta sömu reglum og aðrir?“ spyr hún að lokum.
