„Ég held við ættum öll bara að anda tvisvar, þrisvar, vera ekki að flýta okkur og missa þetta ekki í fjórðu bylgju. Ég veit hvernig það er að lenda í þessu. Þó jólin verði öðruvísi hjá okkur þá kemur þetta,“ sagði Sigurbergur Pálsson, 58 ára trésmiður úr Borgarnesi, í kvöldfréttum RÚV í gærkvöldi.
Í fréttinni kom fram að um tuttugu manns væru nú í líkamlegri og andlegri endurhæfingu á Reykjalundi eftir að hafa glímt við COVID-19. Um sextíu manns sem greindust í fyrstu bylgju faraldursins hér á landi bíða eftir að komast í endurhæfingu.
Sigurbergur smitaðist af veirunni í mars síðastliðnum, en í fréttinni mátti meðal annars sjá Sigurberg gera æfingar í sundi og þreyta þrekpróf á hjóli til að mæla úthald og hámarksáreynslugetu.
Sigurbergur hefur glímt við orkuleysi og seyðing fyrir brjósti en hann smitast af veirunni í lok marsmánaðar. „Ég var þarna á spítala í einhverja 17 daga,“ sagði hann og bætti við að upplifunin hafi verið skelfileg. „Ég vissi ekkert hvort maður færi láréttur eða lóðréttur út,“ sagði hann.
Segja má að endurhæfingin á Reykjalundi sé eins og full vinna, en Sigurbergur mætir klukkan 8 á morgnana og er til klukkan 16. Fólk hefur ýmislegt fyrir stafni; fer í göngutúra, sjúkraþjálfun, sund og situr fyrirlestra svo eitthvað sé nefnt.
Sigurbergur segist allur vera að koma til og hann ætli sér aftur að fara í 100% vinnu. Hann hvetur fólk eindregið til að fara sér hægt á næstunni svo faraldurinn fari ekki á flug aftur. Tíu einstaklingar greindust með veiruna á laugardag samanborið við fimm laugardaginn þar á undan. Hefur nýgengi smita hér á landi þokast upp á við aftur. Nýjar tölur um fjölda smita birtast klukkan 11 á vefnumCOVID.is á degi hverjum.
