„Ég er í smá losti eftir símtal frá klökkum pabba sem þakkaði mér fyrir að hafa bjargað lífi sonar síns,“ segir Sigrún Helga Lund tölfræðingur.
Sigrún Helga stöðvaði hópslagsmálin í miðbænum um helgina en Sigrún er fyrrverandi Íslands- og Evrópumeistari í Brasilísku Jiu Jitsu.
Sigrún segir frá umræddu símtali á Twitter-síðu sinni en hún var inni á Session Craft Bar með vinkonu sínu þegar þær sáu slagsmálin fyrir utan.
„Ég spretti bara út þegar ég sá að það var hópur að sparka í liggjandi mann. Það eina sem ég gerði var að hlaupa inn í hópinn og skamma þá, þá fuðraði hópurinn upp um leið,“ sagði Sigrún Helga í samtali við Fréttablaðiðá mánudag og bætti við:
„Ég veit ekki hversu mikið á að þakka mér fyrir að stöðva slagsmálin.“
Að minnsta kosti einn faðir sá þó ástæðu til að hringja í Sigrúnu og þakka henni fyrir, enda ljóst að einstaklingar geta hlotið alvarleg meiðsl, sérstaklega þegar sparkað er í þá liggjandi eins og sást á myndbandsupptökum frá því á laugardagskvöldið.
„Pössum uppá hvert annað og segjum nei við ofbeldi,“ segir Sigrún í færslu sinni á Twitter sem vakið hefur talsverða athygli. Meðal þeirra sem senda Sigrúnu góða kveðju er Dagur B. Eggertsson borgarstjóri.
„Frábærlega gert og ótrúlega hugrakkt. Þér er ekki fisjað saman! Takk innilega fyrir þína framgöngu!“
