Sigríður Á. Andersen, fyrrverandi ráðherra, virðist ekki vera ánægð með viðbrögð Þórólfs Guðnasonar sóttvarnalæknis og orð sem hann lét falla í gær.
Sigríður er í hópi þeirra sem hafa dregið lagaforsendur þeirra takmarkana sem nú eru í gildi í efa og var forsíðufrétt Morgunblaðsins í gær lögð undir þá skoðun ráðherrans fyrrverandi. Þórólfur var spurður út í málið í gær og í samtali við mbl.is sagði Þórólfur:
„Ég er nú ekki lögfræðingur þannig ég ætla kannski að fara varlega í að tjá mig um lagaleg atriði en ég bendi nú á að Sigríður Andersen hefur ekki stutt - eða ég man nú ekki eftir því að hún hafi stutt þær aðgerðir sem hafa verið í gangi gegn Covid-19. Þannig það er kannski ekki nýtt. Það er annarra en mín að kveða á um lagastoðina.“
Vonbrigði af tveimur ástæðum
Sigríður segir á Facebook-síðu sinni, þar sem hún deilir pistli eftir sig um sama mál, að þetta sé ekki rétt.
„Þessi viðbrögð Þórólfs eru vonbrigði, einkum af tveimur ástæðum. Það er nú fyrir það fyrsta hreinlega ekki rétt að ég hafi ekki stutt sóttvarnaaðgerðir,“ segir hún á Facebook-síðu sinni og bætir við í pistli sínum: „Hins vegar eru þau viðbrögð að vísa í það sem á undan er gengið ekki málefnaleg viðbrögð stjórnvalds við málefnalegri gagnrýni á það sem nú um stundir er gert.“
Sigríður segir að hún hafi frá upphafi faraldursins, bæði sem þingmaður og sem almennur borgari, haft áhuga á því að stjórnvöld fari ekki fram úr sér í viðbrögðum við veirunni veiru sem svo skyndilega varð nánast eina fréttaefnið um allan heim.
„Hvorki með óttaviðbrögðum né harkalegum aðgerðum í nafni sóttvarna sem mögulega litlu máli skipta um útbreiðslu smita en hafa umtalsverð neikvæð áhrif á efnahagslífið, lýðheilsu almennt og heilbrigðiskerfið til lengri tíma.“
Hvað sagði hún á sínum tíma?
Hún rifjar svo upp að hún hafi stutt aðgerðir til að byrja með en hún sagði í júní 2020, á Alþingi, að ánægjulegt hefði verið að fylgjast með því hversu ágætlega stjórnvöld hefðu brugðist við í upphafi faraldursins.
„Allar aðgerðir hafa verið teknar með tilliti til meðalhófs og jafnræðis og menn hafa ekki látið geðshræringuna hlaupa með sig í gönur, eins og við höfum séð í mörgum löndum í kringum okkur og jafnvel nágrannalöndum okkar,“ sagði Sigríður í ræðu sinni.
Hún bætir við í pistli sínum að stefnumörkun stjórnvalda hafi á þessum tíma farið að taka á sig aðra mynd en þarna var lýst.
„Æ oftar var gripið til harkalegra aðgerða sem gengu á grundvallarmannréttindi og sömu aðgerðirnar endurteknar án þess að sýnt sé að tilraun hafi verið gerð til að leggja mat á raunveruleg áhrif þeirra. Vel að merkja, flestar þessara aðgerða voru viðbragð við orðnum hlut. Veitingahúsum lokað þegar smit voru þegar orðin útbreidd. Tafsamt ferli tekið upp í Keflavík þegar smit voru þegar orðin landlæg. Og svo framvegis.“
Pistil Sigríðar má lesa í heild sinni hér.
