Sigríður Á. Andersen, fyrrverandi ráðherra, gagnrýnir sóttvarnaraðgerðir ríkisstjórnarinnar harðlega.
Hertar aðgerðir taka gildi á miðvikudaginn í næstu viku og gilda í fjórar vikur, að undanskyldri grímuskyldu sem tekur gildi strax.
Svandís Svavarsdóttir heilbrigðisráðherra segir aðgerðirnar þó tiltölulega vægar í samtali við Fréttablaðið. Samkomutakmarkanir fara úr 2000 manns í 500, opnunartími skemmtistaða og veitingastaða er styttur úr klukkan eitt til ellefu.
Grímuskylda verður aftur tekin upp í verslunum og á viðburðum. Skerpt verður á reglum um eins metra regluna og verður nánari útfærsla hennar kynnt í reglugerð ráðherra sem birt verður síðar í dag. Svandís segir að smittölur aldrei verið jafn háar og nú. Í gær greindist metfjöldi smita innanlands, alls 167. Fyrra metið var sett 30. júlí, 154 smit.
Sigríður segir ekkert samhengi í aðgerðunum:
„Eins og ég hef bent á sl. 15 mánuði þá er ekkert samhengi á milli aðgerða á landamærum og aðgerða innanlands. Harðar aðgerðir á landamærum leiða EKKI til "eðlilegs lífs innanlands,“ segir hún hvöss á Twitter. „Menn gera bara eitthvað, til að gera eitthvað.“
