Sigmundur Davíð Gunnlaugsson, formaður Miðflokksins og fyrrverandi forsætisráðherra, skrifar í pistli sínum sem birtist í Morgunblaðinu í gær um hörð viðbrögð við spurningu hans til forsætisráðherra, en hann spurði: „Hvað þýðir orðið kona?“
Þar segir hann Twitter, „aðalsamfélagsmiðil hinna gagnrýnustu og hörundsárustu,“ hafa logað enda vakti spurningin hörð viðbrögð með ásökunum um fordóma og fávisku.
„Til að skilja slík viðbrögð við þessari einföldu spurningu, þarf að þekkja til nýrrar harðlínustefnu sem nú hefur verið flutt inn frá útlöndum,“ segir Sigmundur.
Hann segir að víða erlendis þyki sumum óviðeigandi að tala um konur. „Þetta viðhorf hefur verið keyrt áfram af þeirri hörku, að starfsmenn fyrirtækja og opinberra stofnana hafa fengið leiðbeiningar eða verið settir á innrætingarnámskeið um að forðast beri að tala um konur,“ segir Sigmundur og bendir á að víða hafi verið hvatt til orðanotkunar á borð við „einstaklingar sem hafa tíðir“ og „leghafar.“
Sigmundur segist ekki hafa lagt fyrirspurnina fram í hálfkæringi. „Það skiptir verulegu máli hvernig forsætisráðuneytið skilgreinir konur, því það hefur áhrif á lög og framfylgd þeirra,“ segir hann.
Sigmundur segir að það hljóti að vera hægt að ræða þessi mál „án þess að stjórnvöld komi sér hjá því að svara til um áhrifin og að þeir sem spyrja spurninga megi vænta persónulegra árása eða fullyrðinga um að þeir megi ekki tjá sig um málið af því þeir tilheyri ekki réttum hópi.“
Þá segir hann það vera fráleitt að útiloka að konur geti fæðst í líkama karls og öfugt, en það eigi að sýna öllum virðingu, ræða málin af skynsemi og verja um leið konur, karla og börn fyrir skaðlegum þrýstingi og öfgum.
