Sig­mundur Ernir: Lands­menn vilja ekki veikan spítala

„Stjórn­völdum er ó­hætt að fara að vilja þjóðarinnar í heil­brigðis­málum, eins og raunar í hvaða mála­flokki sem er. Hver könnunin af annarri í þessum efnum, árum og ára­tugum saman, hefur sýnt sömu niður­stöðuna: Yfir­gnæfandi meiri­hluti al­mennings vill opin­bert heil­brigðis­kerfi sem er vel rekið fyrir fólkið í landinu, óháð fjár­hag þess og bú­setu.“

Þannig hefst skoðana­grein Sig­mundar Ernis Rúnars­sonar, rit­stjóra Frétta­blaðsins, í helgar­blaði þess í dag og ber hún yfir­skriftina „Veikur spítali“.

Sig­mundur Ernir segir þar að fólk vilji ekki að heil­brigðis­þjónustan fari í mann­greinar­á­lit, „taki þá fram fyrir röðina sem eru efna­meiri og frekari. Það vill mann­úð­lega þjónustu á þessu sviði sem byggir á jafn­ræði.“

Stjórn­endur æðstu heil­brigðis­stofnana landsins hafa að undan­förnu rætt mikið um erfitt á­stand í heil­brigðis­kerfinu og vilja meira fjár­magn og sér­tækar að­gerðir til að mæta á­lagi af völdum Co­vid-19. Sig­mundur Ernir segir þetta eðli­lega kröfu, þar sem Land­spítalanum beri sam­kvæmt lögum að veita nauð­syn­lega há­tækni­þjónustu sama hvort far­sótt geysi eða kreppa. Hann segir að gera verði þá kröfu til stjórn­enda að þeir hugsi í lausnum.

„Í grunninn er Land­spítalinn vel rekin ríkis­stofnun. Af­köst hans standast saman­burð við vel rekna spítala á hinum Norður­löndunum. En hann má ekki stjórnast af kreddum,“ skrifar Sig­mundur Ernir að lokum.