Sig­mundur Davíð: „Yfir­lýst klám­stjarna fengin til að vera eld­gleypir“

Í Frétta­vaktinni á Hring­braut í gær­kvöldi ræddi stjórnandi þáttarins, Sig­mundur Ernir Rúnars­son, við nafna sinn Sig­mund Davíð Gunn­laugs­son, for­mann Mið­flokksins. Ýmis­legt hefur gengið á hjá Sig­mundi og hans flokki frá þing­kosningunum sem haldnar voru undir lok septem­ber­mánaðar síðastliðins.

Mið­flokkurinn tapaði drjúgum hluta fylgis síns í kosningunum og einungis tveimur vikum síðar gekk einn af þremur þing­mönnum flokksins, Birgir Þórarins­son, úr Mið­flokknum og til liðs við þing­flokk Sjálf­stæðis­flokksins.

Sig­mundur Davíð var spurður út í flokka­skiptin í Frétta­vaktinni í gær­kvöldi: „Þetta kom náttúru­lega gríðar­lega á ó­vart. Þetta hefur aldrei gerst áður að þing­maður – strax eftir kosningar, áður en að þing hefur verið sett, áður en búið er að stað­festa kjör­bréf – skipti um flokk. Og svo hefur hann gefið til kynna að þetta hafi staðið til síðan fyrir kosningar,“ segir Sig­mundur um sinn fyrr­verandi flokks­bróður.

Flokkaskiptin svívirðileg

Að­spurður hvort hann myndi kalla flokka­skipti Birgis svik segir Sig­mundur Davíð þetta: „Þetta eru náttúru­lega svik við fólkið sem var að vinna fyrir hann, fyrir flokkinn. Menn líta oft fram­hjá því hvað þarf mikið til að vera með fram­boð. Þú þarft fullt af sjálf­boða­liðum, sem margir hverjir leggja á sig gríðar­lega vinnu, sumir taka sér jafn­vel frí frá vinnu til að vinna fyrir flokkinn. Við vorum með fimm kosninga­skrif­stofur.“

Því næst er hann spurður hvort hann myndi jafn­vel telja at­hæfi Birgis sví­virði­leg: „Gagn­vart þeim sem að þú færð til að vinna fyrir þig á á­kveðnum for­sendum, þá er þetta það auð­vitað. Tæki­færis­mennska aug­ljós­lega, að því er virðist, miðað við skýringarnar – sem breytast reyndar mjög reglu­lega eftir því sem kemur í ljós að hinar fyrri hafi ekki staðist. En hvað um það, þetta virðist vera niður­staðan þó það verði kannski skoðað hvort þetta hafi allt verið með felldu sam­kvæmt gildandi reglum. En við bara vinnum út frá þeirri stöðu sem kemur upp hverju sinni,“ segir Sig­mundur Davíð.

Hann er ekki sáttur við við­brögð þing­manna Sjálf­stæðis­flokksins við flokka­skiptum Birgis: „Það er mjög sér­stakt að fylgjast með um­ræðum hjá sjálf­stæðis­mönnum eftir þetta og svara þeir iðu­lega, þegar þeir eru spurðir hvernig hann passi í þing­flokkinn: „Sjálf­stæðis­flokkurinn er breiður flokkur, alls konar fólk getur verið hérna. Bryn­dís Haralds­dóttir og Birgir Þórarins­son og alls konar fólk,““ segir Sig­mundur Davíð.

Hraunar yfir Sjálfstæðisflokkinn og Framsókn

Hann heldur á­fram og veltir fyrir sér: „Um hvað snýst Sjálf­stæðis­flokkurinn? Eru þetta bara sam­tök á­huga­fólks um eigið þing­sæti? Sam­tök á­huga­fólks um mögu­legt ráð­herra­sæti? Frekar en ein­hverja stefnu? En Sjálf­stæðis­flokkurinn hefur verið að þróast í þessa átt og af­saka það með því að hann sé svo breiður að skoðanir skipti ekki máli.“

Honum þykir lítið til Sjálf­stæðis­flokksins koma um þessar mundir: „Mér finnst hann vera þróast yfir í það að vera inni­halds­laus kerfis­flokkur. Að því marki sem hann hefur inni­hald þá hefur það verið að færast mjög hratt til vinstri. Yfir í nýju vinstri-ný­aldar­pólitíkina sem ég kalla sem svo og fyrst og fremst bara það að langa að vera í ríkis­stjórn til að vera í ríkis­stjórn.“

Sömu sögu hefur Sig­mundur Davíð að segja um sinn gamla flokk, Fram­sóknar­flokkinn: „Fór náttúru­lega mjög hart til vinstri í að­draganda kosninganna eins og bent hefur verið á. Fengu meira að segja fram­bjóð­endur frá Sam­fylkingu og öðrum vinstri flokkum á lista hjá sér og fóru mikið í slíkar á­herslur. Tóku upp á alls konar brellum, það hefði komið mér á ó­vart á sínum tíma ef Fram­sóknar­flokkurinn hefði haldið sam­kvæmi þar sem yfir­lýst klám­stjarna var fengin til að vera eld­gleypir. Þetta var flokkur sem var vanari karla­kórum og ein­hverjum slíkum at­riðum,“ segir Sig­mundur Davíð og er greini­lega ekki alls­kostar hrifinn af þeirri stefnu sem Fram­sókn hefur tekið síðustu ár.

Hann er hvergi banginn eftir kosningarnar

Sigmundur var spurður út í fylgis­tap Mið­flokksins og hvort það hefði hrein­lega í för með sér að flokkurinn væri að deyja: „Nei. Hann er ekki að deyja. Það er ekkert skrítið að þú spyrjir, við fórum ekkert vel út úr þessum kosningum sem komu mjög á ó­vart fyrir okkur og reyndar marga aðra flokka. Úr­slitin komu mér á ó­vart á ýmsan hátt,“ segir for­sætis­ráð­herrann fyrr­verandi.

Hann heldur á­fram og segir gott hljóð í flokks­mönnum: „Ég hef upp­lifað það eftir kosningarnar og kannski sér­stak­lega núna síðustu daga, að stemningin í flokknum hefur ekki verið eins góð – hún hefur verið góð reyndar lengi – en ekki eins góð í langan tíma. Maður mætir í vöfflu­kaffi ó­for­var­endis og það er bara troð­fullt hús og gríðar­leg stemning. Maður heyrir það á flokks­fólki um allt land að menn líta bara á þetta sem nýtt upp­haf. Nú gefist tæki­færi til þess að laga það sem betur má fara og byggja upp. Þannig að það er til­hlökkunar­efni,“ segir Sig­mundur Davíð.

Þá segist hann ekki vera að hugsa sér til hreyfings: „Nei, alls ekki. Ég hef náttúru­lega, frá því ég byrjaði í pólitík, alltaf velt fyrir mér hvað ég ætti að vera lengi í þessum bransa. En þörfin fyrir aðra nálgun í pólitíkinni heldur en það sem hinir flokkarnir bjóða upp á hefur aldrei verið jafn mikil eins og núna, þannig að svarið er: ég held á­fram.“