Sigmundur Davíð Gunnlaugsson, formaður Miðflokksins, hefur verið gagnrýndur töluvert á samfélagsmiðlum eftir ræðu sína á Alþingi í gærkvöldi.
Sigmundur vísaði meðal annars til frumvarpa sem Katrín Jakobsdóttir forsætisráðherra lagði fram í ríkisstjórn í vikunni, en markmið þeirra er að tryggja rétt fólks með kynhlutlausa skráningu og trans fólks auk barna sem fæðast með ódæmigerð kyneinkenni.
„Í fyrsta lagi er um að ræða frumvarp um breytt aldursviðmið til að breyta opinberri skráningu kyns, og samhliða nafni. Þar er lagt til að miða við 15 ára aldur í stað 18 ára. Í öðru lagi er frumvarp sem tryggir rétt barna, sem fæðast með ódæmigerð kyneinkenni, gegn ónauðsynlegum skurðaðgerðum og þannig er staðið vörð um líkamlega friðhelgi þeirra. Í þriðja lagi er lagt fram frumvarp til laga um breytingar á ýmsum lögum til að tryggja lagaleg réttindi fólks með kynhlutlausa skráningu og trans fólks,“ eins og segir á vef stjórnarráðsins þar sem fjallað var um frumvörpin.
Í ræðu sinni sagði Sigmundur að frumvarp um réttindi intersex barna væri „aðför að framförum og vísindum“ eins og hann orðaði það og sagði að um væri að ræða líklega „óhugnanlegasta þingmál“ sem hann muni eftir í seinni tíð.
„Þetta er aðför að framförum og vísindum. Þetta er aðför að frelsi foreldra, þetta er aðför að frelsi heilbrigðisstarfsfólks og þetta er aðför að réttindum barna,“ sagði hann meðal annars.
Ummæli Sigmundar vöktu talsverða athygli enda málið verið stór hluti af hagsmunabaráttu intersex fólks í gegnum tíðina.
Sóley Tómasdóttir, fyrrverandi borgarfulltrúi VG, sagði til dæmis á Twitter-síðu sinni:
„Ég vissi ekki að það væri hægt að vera jafn innilega ósammála hverju einasta aukatekna orði sem vellur upp úr einum manni. Sigmundur Davíð boðar ógeðfelldustu hugmyndafræði sem ég get hugsað mér.“
Ellen Calmon, fyrrverandi formaður Öryrkjabandalagsins og formaður Samfylkingarfélagsins í Reykjavík, segir á Twitter: „Hélt þetta væri ekki hægt! Sigmundur Davíð er að toppa sig. Lagfæra skal og lækna fæðingargalla eins og ódæmigerð kyneinkenni. Ef það má ekki þá er það aðför að frelsi foreldra. Hvað með sjálfsákvörðunarrétt barnsins!“
Hrafn Jónsson, pistlahöfundur og kvikmyndagerðarmaður, segir: „Sigmundur Davíð er bara eitthvað random píluspjald af vondum skoðunum sem róterast eftir því hvað er heitast í einhverjum glötuðum subkúltúr hverju sinni. Það er engin alvöru sannfæring á bak við neitt. Gerir hann samt ekkert minna hættulegan - mögulega enn hættulegri.“
Eiríkur Rögnvaldsson, fyrrverandi prófessor í íslensku við Háskóla Íslands, segir á Facebook að Sigmundur Davíð sé lýðskrumari og málflutningur hans fyrirlitlegur. „Þarna er um að ræða mikilvægt réttindamál og grátbroslegt að formaður flokks þar sem stuðningsmenn Trumps eru næstum helmingur kjósenda skuli flagga framförum og vísindum.“
Þá segir Halldór Auðar Svansson, fyrrverandi borgarfulltrúi Pírata, á Twitter að svo virðist sem Sigmundur sé að reyna að taka íhaldsfylgi af Sjálfstæðisflokknum. „En ég held að þetta rugl nái ekki einu sinni inn hjá þeim markhópi. Það er nefnilega munur á íhaldi og afturhaldi, þetta kemur bara út sem ágætis auglýsing fyrir því að stjórnin er alveg að gera sumt gott.“
