„Málefni förufólks, flóttamanna og annarra sem ferðast um langan veg vegna væntinga um betra líf, eru í algjörri óreiðu á Íslandi,“ segir Sigmundur Davíð Gunnlaugsson, formaður Miðflokksins, í aðsendri grein í Morgunblaðinu í dag.
Sigmundur viðrar þar áhyggjur sínar af málefnum flóttamanna hér á landi.
„Þetta hef ég nefnt alloft áður og oft fengið bágt fyrir. Oft hefur verið svarað með útúrsnúningum og sleggjudómum án tengsla við raunveruleikann. En nú hefur raunveruleikinn hlaupið sýndarmennskuna uppi eins og jafnan gerist fyrr eða síðar.“
Sigmundur rifjar upp að nokkur ár séu liðin síðan þingmenn Miðflokksins tóku að benda á að fjöldi hælisleitenda á Íslandi væri hlutfallslega orðinn margfalt meiri en í öðrum Norðurlandaríkjum.
„Á sínum tíma bentum við á að hann væri orðinn sexfalt meiri en í Danmörku og Noregi og rúmlega tvöfalt meiri en í Svíþjóð sem er þekkt fyrir opna stefnu í málaflokknum.“
Sigmundur segir að bent hafi verið á ástæðurnar; Noregur og sérstaklega Danmörk hefðu innleitt stefnu sem ætlað var að takast á við vandann út frá staðreyndum. „Þannig yrði þessum löndum gert kleift að gera sem mest gagn fyrir þá sem eru í mestri neyð. – Fremur en að vera áfangastaður þeirra glæpagengja sem hneppa fólk í ánauð og senda það í hættuför með því að selja væntingar um bætt lífskjör.“
Sigmundur segir að Ísland hafi farið í þveröfuga átt.
„Ríkisstjórnin auglýsti í raun Ísland sem áfangastað með reglunum sem hún innleiddi og þeim skilaboðum sem hún sendi frá sér. Það gekk í berhögg við stefnu danskra stjórnvalda. Forsætisráðherrann, Mette Frederiksen, leiðtogi Jafnaðarmanna, lýsti því yfir að markmiðið væri að enginn kæmi til landsins til að sækja þar um hæli. „Danmörk má ekki vera söluvara glæpagengja,“ sagði Mette. Hún og danskir Jafnaðarmenn hafa metið stöðuna út frá staðreyndum. Markmiðið er ekki að loka landinu fyrir fólki í neyð heldur að nálgast þessi stóru og erfiðu mál á þann hátt að hægt sé að gera sem mest gagn. Hjálpa sem flestum þeirra sem þurfa mest á hjálp að halda og gera það sem best.“
Sigmundur segir að hér á landi séu þessu öfugt farið.
„Stjórnvöld senda frá sér skilaboð sem virka sem auglýsingaefni fyrir þá sem skipuleggja fólksflutninga. Slík skilaboð dreifast hratt á samfélagsmiðlum eða á götuhornum þar sem dreifibréfum er útdeilt. Ég er minnugur þess þegar finnskur ráðherra sagði mér að stjórnvöld þar í landi hefðu orðið felmtri slegin þegar 50-60.000 manns komu skyndilega frá tilteknu landi til að sækja um hæli. Ástæðan reyndist sú að reglubreyting, sem finnska þingið taldi smávægilega, hefði sett Finnland á kortið sem vænlegan áfangastað. Straumi, sem áður var beint til Belgíu, var snúið til Finnlands.“
Sigmundur segir að ríkisstjórn Íslands hafi sett stóran rauðan hring um Ísland sem áfangastað með þeim reglum sem hér gilda og þeim skilaboðum sem hún hefur sent frá sér.
„Þetta er löngu orðið augljóst en nýjasta útspilið felst í svokölluðum lögum um samræmda móttöku flóttamanna. Með lögunum er öllum sem fá landvistarleyfi tryggð sama þjónusta og greiðslur óháð því hvernig þeir koma til landsins,“ segir Sigmundur.
Grein hans má lesa í heild sinni í Morgunblaðinu í dag.
