Una María Óskarsdóttir, varaþingmaður Miðflokksins, var málshefjandi um bætt uppeldi, leið til forvarna og lýðheilsu í þinginu í morgun. Una María sagði fjölmiðla alltof oft færa almenningi fréttir af vanlíðan, heimilisofbeldi og eiturlyfjaneyslu ungs fólks. Una María nefndi ýmsa þætti en fyrirferðarmestir voru ofbeldistölvuleikir. Um leikina sagði Una María:
„Í gær heyrði ég sögu um níu til tíu ára drengi sem höfðu fengið að valsa greinilega í ofbeldistölvuleikjum og ljótur talsmáti þeirra var farinn að berast um bekkinn. Með leyfi forseta vil ég umorða þau hryllingsorð sem þeir létu falla og mín orð eru þessi:
„Fyrst velur þú þér portkonu til að sænga hjá, síðan velur þú um nokkrar leiðir til að taka hana af lífi.“
Þið getið rétt ímyndað ykkur hver orðin voru í raun.“
Þórhildur Sunna sagði það væri góðra gjalda vert að hugsa um lýðheilsu barna en setti stórt spurningarmerki við að Sigmundur Davíð ætti að vera leiðarljós foreldra þegar kæmi að uppeldi. Þórhildur Sunna sagði:
„Það er góðra gjalda vert að hugsa um lýðheilsu barna en ég get ekki sagt að háttvirtur þingmaður, Sigmundur Davíð ætti að vera leiðarljós foreldra í uppeldinu, með sínar forneskjulegu hugmyndir um barnauppeldi.
Mér eru enn minnisstæð orð hans í Kryddsíldinni á síðasta ári þar sem hann gat ekki hugsað sér að börn fræddu foreldra sína um loftslagsbreytingar. Þessu ætti að vera öfugt farið, foreldrar ættu að fræða börn sín og búið, burtséð frá því að aðgerðarleysi foreldra ógna framtíð barnanna.“
Þórhildur Sunna fannst Una María senda óljós skilaboð um hvað væri þess valdandi börn gripu til ofbeldis. Upplifun þingmanns Pírata var að eldri kynslóðin liti á þá yngri sem óalandi, óferjandi og miklu óstyrlátari en þegar þau voru á sama aldri.
„Mér finnst ég skynja þennan anda svífa yfir vötnum sem endranær þegar málefni ungs fólks eru rædd, enda á ungt fólk fáa fulltrúa hér.“ Þá sagði Þórhildur Sunna að lokum:
„Ég vil því koma yngstu kynslóðinni til varnar. Hún er betur búin, víðsýnni og jafnvel réttsýnni en við öll hér með tölu. Það færi því vel á því að við leyfðum þeim endrum og eins að ala okkur upp.“
