Sigmar Guðmundsson, fyrrverandi fjölmiðlamaður og frambjóðandi Viðreisnar fyrir komandi þingkosningar, hefur áhyggjur af stöðu mála í íslensku heilbrigðiskerfi.
Þetta kemur fram í grein Sigmars sem birtist á vef Vísis í morgun, en sem kunnugt er skipar hann 2. Sætið á lista Viðreisnar í suðvesturkjördæmi fyrir kosningarnar í september næstkomandi.
„Ég fór í hlaðvarpsviðtal á dögunum til Snæbjörns Ragnarssonar. Hann spurði mig meðal annars um hið margslungna fyrirbæri sem alkóhólismi er. Við ræddum það auðvitað fram og til baka, enda efnið mér hugleikið. Að loknu viðtalinu gekk ég út í sumarið sem var talsvert sólríkara þann daginn en þessa síðustu daga hér á höfuðborgarsvæðinu.“
Sigmar segir að stuttu seinna hafi hann séð á einum vefmiðlinum að fleiri en hann gengu út í sumarið þennan sama dag – reyndar án þess að vilja það.
„Árleg sumarlokun hjá SÁÁ vegna fjárskorts er ástæðan. Engin eftirmeðferð á Vík fyrir alkóhólista í boði í sex vikur. Framkvæmdastjórinn bendir á hið augljósa. Það er ekki alveg nógu tillitssamt af okkur að vera með sjúkdóm á Íslandi á sumrin.“
Sigmar segist ekki vilja hljóma of dramatískur en staðreyndin sé sú að sumir sjúkdómar geta verið banvænir. Alkóhólismi sé klárlega einn þessara sjúkdóma.
„Hann er líka óvenju erfiður viðureignar því sjúklingurinn, sem er iðulega í afneitun, er ekki alltaf tilbúinn til að fara inn á Vog og síðan í eftirmeðferð á Vík. Oft þarf að beita fortölum og stundum dugir það ekki til. Það skiptir því öllu máli fyrir þann veika að úrræðið sé í boði þegar hann er fús til að fara í meðferð. Sá fúsleiki fer ekki eftir möndulsnúningi jarðar og árstíðaskiptum, þótt það sé skilningur þeirra sem stýra fjárflæðinu í heilbrigðiskerfinu.“
Sigmar er þeirrar skoðunar að þessi sumarlokun geti verið upp á líf og dauða.
„Fyrir nú utan að réttlætisrök hljóta að segja okkur að fárveikur alki, sem leggst inn á Vog í byrjun sumars, á sama rétt á eftirmeðferð á Vík og sá sem leggst inn í október. Höfum í huga að þessi sumarlokun á Vík hefur áhrif á sama sjúklingahóp og húkir á biðlistum eftir að komast á Vog. Á biðlistanum voru um 500 manns fyrir tæpu ári, svo dæmi sé tekið. Á árunum 2018 og 2019 lést 21 einstaklingur sem biðu eftir innlögn á Vog,“ segir Sigmar og bætir við að þessi tvo orð, sumarlokun og biðlisti, séu því mjög merkingarþrungin hjá aðstandendum veiks fólks.
Sigmar segir að biðlistar í heilbrigðiskerfinu séu birtingarmynd ákvarðana sem hafa verið teknar eða ákvarðanaleysis. Þeir séu mannanna verk og á ábyrgð ríkisstjórnarinnar. Bendir hann á fleiri langa biðlista, til dæmis biðlista barna eftir sálfræðiþjónustu, biðlista eftir átröskunarmeferð, biðlista eftir liðskiptum og biðlista fyrir börn sem þurfa á aðstoð talmeinafræðings að halda.
„Þetta er auðvitað ekki í lagi. Það sér hver maður. Kerfið okkar á ekki að vera þannig að allt afbragðsfólkið sem þar starfar sé ósátt og að notendurnir þurfi að bíða mánuðum saman eftir nauðsynlegri og stundum lífsnauðsynlegri þjónustu. Við eigum að hafa metnað til þess gera betur.“
