„Ég er nú Evrópusinnaður maður, en þetta finnst mér full langt gengið,“ segir Sighvatur Björgvinsson, fyrrverandi ráðherra og formaður Alþýðuflokksins, í samtali við Fréttablaðið.
Fréttablaðið sagði frá því í gærkvöldi að íslenskir hótelgestir sem hafa pantað gistingu hér á landi á erlendum bókunarsíðum þurfi gjarnan að greiða fyrir næturvistina með evrum í stað íslenskra króna.
Sighvatur furðar sig á þessu en hann var á ferð um Vestfirði um liðna helgi með eiginkonu sinni, Björk Melax. Þegar kom að uppgjöri vegna gistingar á Fosshóteli Vestfjörðum á Patreksfirði var hann aftur á móti krafinn um greiðslu í evrum.
„Gistingin kostaði okkur hjónin tæpar fimmtíu þúsund krónur og látum það nú vera, við vissum að íslensk hótel eru hátt verðlögð á þessum árstíma, en ég undraðist það nokkuð að þurfa að greiða gistinguna fyrir fram – og enn meira þegar ég var krafinn um evrur til að greiða fyrir hana,“ segir Sighvatur við Fréttablaðið.
Forsvarsmenn Íslandshótela sem reka Fosshótel hringinn í kringum landið segja að svona sé í pottinn búið þegar ferðamenn panti gistingu á erlendum bókunarsíðum á borð við booking.com, en þar séu verð að jafnaði gefin upp í evrum, velji þeir ekki sérstaklega innlenda gjaldmiðilinn.
„Ég pantaði gistinguna vissulega á booking.com, en ég pantaði hana ekki í evrum,“ segir Sighvatur.
Hann furðar sig á því að íslensk hótel geti ekki tekið við íslenskum gjaldmiðli, þótt ferðamenn panti gistinguna rafrænt. „Þetta eru bara reglur, sagði starfsmaðurinn í afgreiðslunni og þar við sat,“ bætir hann við.
