Sighvatur Björgvinsson, fyrrum þingmaður og ráðherra, hefur ritað grein í Kjarnann þar sem hann leggur út af offitufréttaskýringu Kveiks í vikunni og miklum viðbrögðum í kjölfarið. Sighvatur segir að sá feiti sjái um að fitusmána sjálfan sig.
„Setjum sem svo, að ég segi við vin minn: „Þú ert orðinn allt of þungur. Það veldur öllum, sem þér þykir vænt um, sálarkvölum – konunni þinni, börnunum þínum, vinunum þínum - og sjálfum þér miklu heilsutjóni“, þá telst ég vera að fitusmána vin minn algerlega að ósekju og sjálfum mér til mikils ámælis. Sá vinur minn, sem orðinn er 140 til 150 kg. á þyngd, hefur algerlega séð um það sjálfur að fitusmána sig. Á við engan annan en sjálfan sig að sakast og getur til einskis annars leitað en fyrst og fremst til sjálfs sín að takast á við það vandamál sitt með árangri og með annari hjálp, sem hinn fitusmáði verður þó sjálfur og einn að bera sig eftir,“ segir í grein fyrrum ráðherrans í Kjarnanum.
Þá rifjar Sighvatur upp að sem barn á Vestfjörðum þar sem hann ólst upp hafi í jafnaldrabekkjum í barnaskóla á Ísafirði verið um 70 önnur börn. Í öllum þessum hópi hafi aðeins verið einn drengur, sem sagður var vera feitur.
„Var það vegna þess, að heilsugæslan á Ísafirði væri svona mannmörg og skipti sér svona mikið af fæðuuppeldi barnanna?“ spyr Sighvatur.
„Nei, það var einfaldlega vegna þess, að uppeldi barna var í höndum foreldra,“ svarar Sighvatur sjálfur.
Hann beinir svo spjótum að Kveik og skrifar:
„Í Kveik virtist vera að það [aukin ofþyngd] væri sök heilsugæslustöðvarinnar. Þar þyrfti fleiri starfsmenn: Líkamsþjálfa, fæðuspecialista, fjölskylduráðgjafa, menntaða fagmenn og fagkonur. Aldeilis hreint ekki neina fitusmánara.“
