Sigurður Þ. Ragnarsson veðurfræðingur, betur þekktur sem Siggi Stormur, er bjartsýnn maður að eðlisfari en það er ekki hægt að greina mikla bjartsýni í orðum hans um veðrið hér á landi í júlí.
Júnímánuður hefur verið kaflaskiptur á landinu og það hafa komið góðir dagar hér og þar. Síðustu dagar mánaðarins hafa aftur á móti verið kaldir og var nýliðin helgi ein sú kaldasta norðan heiða í manna minnum.
„Síðasta helgi var náttúrlega skelfileg og ekki nema von að fólk vilji vita hvort það eigi von á öðru svona,“ segir Sigurður í viðtali við Fréttablaðið í dag.
„Þótt það hafi ekki verið eins kalt syðra blés það kröftuglega að það var óvíða notalegt. Hitinn var mest að skrölta einhvers staðar í fjórtán, fimmtán stigum.“ Hann segir að miðað við reiknilíkön sér hann ekki fyrir sér að tuttugu stiga hitamúrinn verði rofinn á Norðurlandi í júlí.
„Svipaða sögu er að segja syðra. Það er aldrei loku fyrir það skotið. Þessar spár ná kannski aldrei utan um toppana en það er óttaleg flatneskja í þessu. Þetta er búið að vera mjög brattgengt en mér sýnist að það verði kannski jafnara veður með minni öfgum.“
Sigurður segir að ágústmánuður sé jákvæðari á alla kanta.
