Sigurður Þorri Gunnarsson, eða Siggi Gunnars eins og hann er gjarnan þekktur kveður K100 eftir átta ára starf. Í samtali við Fréttablaðið segist hann fullur tilhlökkunar yfir nýja starfinu sem tónlistarstjóri Rásar 2 en að hans sögn er það sannkallað draumastarf.
Siggi Gunnars segir almannaútvarp hafa verið sér hugleikið lengi og því hafi hann slegið til og sótt um starfið þegar það var auglýst en hann hefur starfað sem dagskrár- og tónlistarstjóri útvarpsstöðvarinnar K100 um árabil.
Í tilkynningu frá RÚV segir að starfið hafi verið auglýst í byrjun mars og að gengið hafi verið frá ráðningu við Sigga Gunnars í gær. Í rökstuðningi fyrir ráðningunni kom fram að hann uppfyllti allar hæfnikröfur mjög vel, hefði menntun á sviði fjölmiðlafræði og útvarps ásamt því að búa yfir mikilli reynslu af dagskrárgerð og tónlistarstjórn.
Mbl hefur greint frá því að Ágúst Héðinsson, viðskiptafræðingur, hafi verið ráðinn nýr dagskrárstjóri útvarpssviðs Árvakurs sem rekur K100 í stað Sigga Gunnars. Magnús E. Kristjánsson útvarpsstjóri Árvakurs segist óska Sigga Gunnars velfarnaðar á nýjum vettvangi og þakkar honum gott samstarf.
Sex ára með útvarpsbakteríu
Siggi Gunnars segist hafa verið sex ára þegar hann fékk útvarpsbakteríuna. „Litli-Siggi var bara sex ára þegar hann fékk að fylgjast með Gesti Einari að störfum á RÚVAK en þaðan sendi hann út þáttinn Hvíta máva að loknum hádegisfréttum. Eftir það var ekki aftur snúið, útvarpsbakterían var komin til að vera.
Almannaútvarp hefur verið mér hugleikið lengi, en bæði BA ritgerðin mín og MA verkefnið mitt fjölluðu einmitt um hlutverk almannaútvarps og í meistaranáminu í Bretlandi lagði ég sérstaka áherslu á að kynna mér vel útvarpshluta BBC,“ segir Siggi Gunnars meðal annars í færslu á Facebook.
