Aud Lise Norheim, sendiherra Noregs á Íslandi, er á batavegi eftir að hafa lent í miklum ógöngum í Heiðmörk á dögunum. Aud datt illa þegar hún var að hlaupa með þeim afleiðingum að hún handleggs- og fótbrotnaði. Tvær konur komu Aud til aðstoðar og leitar hún nú að þeim til að geta þakkað þeim fyrir.
Fréttablaðið greinir frá þessu í dag.
Eðli málsins samkvæmt var Aud mjög kvalin og náði hún ekki að þakka konunum sem aðstoðuðu hana. Slysið varð um kvöldmatarleytið miðvikudaginn 23. September síðastliðinn en með Aud í för var eiginmaður hennar. Hann fór hins vegar aðra leið og ætluðu þau að mætast á ákveðnum stað en þær áætlanir fóru út um þúfur eftir að hún datt og slasaðist. Sjálf telur Aud að hún hafi legið bjargarlaus í um korter áður en konurnar tvær komu að henni.
„Ég sá tvær konur koma og þær studdu mig að bílnum sínum og keyrðu með mig á bráðamóttöku spítalans í Fossvogi,“ segir hún við Fréttablaðið. Hún náði ekki nöfnum kvennanna enda hafði hún um ýmislegt annað að hugsa á þessum tímapunkti, enda kvalin mjög.
„Mig langar til að finna þessar konur og þakka þeim,“ segir Aud. „Ég gat ekki gert það á staðnum því að ég gat ekki hugsað um neitt annað en að komast á spítalann. Ég veit ekki hvað hefði gerst ef þær hefðu ekki fundið mig,“ segir hún.
Hún vonast til að konurnar hafi samband og segir Aud auðveldast að gera það í gegnum norska sendiráðið, sem staðsett er að Fjólugötu 17 í Þingholtunum. Símanúmerið þar er 520-0700.
