Sema Erla ætlar ekki á þing: Ætlar að halda sinni baráttu áfram þrátt fyrir þöggunartilraunir

Sema Erla Serdar, stjórnmála- og Evrópufræðingur og baráttukona fyrir mannréttindum, mun ekki taka sæti á neinum lista hjá Samfylkingunni fyrir komandi kosningar. Þetta kemur fram í opnu bréfi sem Sema Erla birti á Facebook-síðu sinni í gærkvöldi en hún hefur barist ötullega fyrir réttindum flóttafólks á undanförnum árum.

Kæru vinir og félagar, ég vil nýta þennan vettvang til þess að þakka öllum þeim sem tilnefndu mig á lista Samfylkingarinnar fyrir Alþingiskosningarnar sem fara fram í haust, jafnt í Reykjavík sem og í Kraganum. Mér þykir mjög vænt um stuðning ykkar og ég met hann mikils. Ég tók ákvörðun um að afþakka boð um þátttöku í umtalaðri könnun hjá félaginu í Reykjavík og ég mun ekki taka sæti á neinum lista hjá flokknum fyrir komandi þingkosningar.“

Sema Erla hefur starfað innan Samfylkingarinnar á undanförnum árum, en hún var formaður framkvæmdastjórnar flokksins, formaður Samfylkingarfélagsins í Kópavogi og var í þriðja sæti á lista flokksins í Kraganum fyrir kosningarnar 2016.

„Þangað vildi ég stefna þá. En í dag slær hjarta mitt annars staðar. Ég hef síðustu ár helgað mig baráttunni fyrir mannréttindum, réttlæti, jafnrétti og mannúð, meðal annars fyrir fólk á flótta og aðra jaðarsetta hópa og gegn fordómum, hatursorðræðu, mismunun og rasisma í fjölmenningarsamfélaginu okkar. Ég er stofnandi og formaður hjálparsamtaka fyrir fólk á flótta sem hafa hjálpað hundruðum einstaklinga í neyð frá stofnun samtakanna árið 2017, þökk sé stuðningi ykkar.“

Sema bendir á að samtökin hafi komið í veg fyrir tugi, jafnvel hundruð, brottvísanir barna, fjölskyldna og einstaklinga sem senda átti úr landi og aftur á flótta.

„Það er ótrúlegur árangur þrátt fyrir að engar raunverulegar umbætur hafi orðið á málaflokknum síðustu ár. Þeirri baráttu er því alls ekki lokið og ég ætla að halda áfram að veita fólki á flótta rödd í samfélaginu okkar og berjast fyrir mannréttindum þeirra þar til við sjáum umbætur á málaflokknum. Að taka sæti á lista stjórnmálaflokks fyrir kosningar finnst mér ekki haldast í hendur við það markmið.“

Sema segist vera langt frá því að leggja baráttuskó sína á hilluna þrátt fyrir ítrekaðar tilraunir nýnasista, rasista og þjóðernissinna til að þagga niður í henni.

„Þó mínar áherslur og mín baráttumál eiga vissulega erindi á Alþingi þá getum við ekki öll verið að berjast á sama stað. Það eru þó nokkrir einstaklingar sem eiga sæti á þingi og enn fleiri sem gefa nú kost á sér fyrir næstu kosningar, fyrir nokkra flokka, sem ég treysti fyrir því að leggja áherslu á mannréttindi og mannúð og að berjast gegn mismunun og óréttlæti inni á þingi.“

Sema bendir svo á að það sé oft þannig að þau mál sem fara í gegnum þingið og eiga að bæta samfélagið okkar geri það vegna þrýstings utan frá.

„Í baráttunni hef ég átt í góðu samstarfi við fólk þvert á flokka og á ekki von á öðru en að það haldist óbreytt. Eins og staðan er í dag ætla ég því að vera áfram í liði baráttufólks fyrir betra samfélagi og betri heimi, utan þings, og ég vona að ég njóti sama stuðnings ykkar til þess áfram. Hver veit hvað gerist svo síðar!“