Netverjar hafa bent á umtalsverð líkindi á milli lúxussólgleraugna Moxen Eyewear og ódýrra sólgleraugna sem hægt er að kaupa á netinu, og telja einhverjir víst að Moxen Eyewear sé hreinlega að endurselja gleraugu á talsvert hærra verði. Þetta kemur fram í frétt Fréttablaðsins.
Það er stjörnuparið Lína Birgitta Sigurðardóttir og Guðmundur Birkir Pálmason, betur þekktur sem Gummi Kíró, sem er á bak við Moxen Eyewear.
Í viðtali við mbl.is halda þau því fram að þau hafi sjálf hannað gleraugun en líkindin eru frekar mikil.
Grétar Þór Sigurðsson, blaðamaður Kjarnans, birti myndir af tveimur týpum af sólgleraugum Moxen Eyewear á Twitter í gær, ásamt tveimur myndum af gleraugum á AliExpress.com. Af þeim myndum að dæma eru líkindin ótvíræð.
„Nei, ég trúi þessu ekki. Þau hjá Ali bara búin að stela hönnun Línu Birgittu og Gumma kíró.“ skrifaði Grétar með kaldhæðnislegum brag.
Nei, ég trúi þessu ekki. Þau hjá Ali bara búin að stela hönnun Línu Birgittu og Gumma kíró. pic.twitter.com/xshdxqZOTB
— Grétar Þór (@gretarsigurds) July 19, 2022
Færsla Grétars hefur vakið mikla athygli á samfélagsmiðlum og hlotið miklar undirtektir. Þá hefur fólk bent á líkindi annarrar týpu Moxen Eyewear við gleraugu sem fást á Alibaba.com.
Íslenskasta sem ég veit pic.twitter.com/AYpdQlxVWC
— Eva Rakel Jonsdottir (@EvaRakelJonsdo1) July 19, 2022
Gleraugun sem fást á Aliexpress og Alibaba eru talsvert ódýrari en þau hjá Moxen Eyewear og kosta almennt nokkur hundruð krónur, og þau ódýrustu auglýst á einungis eina krónu, en þar er þó sendingarkostnaður og önnur slík gjöld ekki tekin með.
Auglýst verð á sólgleraugum Moxen Eyewear eru aftur á móti á bilinu 7990 til 8990 krónur. Netverjar gefa margir hverjir til kynna að Lína og Guðmundur kaupi gleraugun og selji þau aftur á talsvert hærra verði.
