Skömmu eftir sölu Bankasýslunnar á 22,5% hlut ríkisins í Íslandsbanka birti Páll Magnússon oddviti Heimeyjarlistans í komandi kosningum sögu á facebook um að kunningi hans hafi með viðsnúningi á einum sólarhring grætt 10 milljónir með því að kaupa í Íslandsbanka og selja bréfin daginn eftir.
Mikið hefur verið rætt um þessa frásögn Páls og sagði Bjarni Benediktsson fjármálaráðherra í Sprengisandi á sunnudaginn að hún gengi einfaldlega ekki upp þar sem bréfin voru ekki afhent fyrr en sex dögum eftir söluna.
Páll benti síðan á það réttilega í gær að það hefði verið hægt að selja daginn eftir útboðið meðal annars með framvirkum samningum.
Samkvæmt skoðun Viðskiptablaðsins kemur hins vegar í ljós að enginn fór í slík viðskipti daginn eftir útboðið og því gengur saga Páls ekki upp.
Páll sagði að vinurinn hefði lýst viðskiptunum sem „snöggum snúning“ sem gæti líklega gert kunningja Páls 10 milljónum ríkari yfir nótt, sem hefði svo staðist nánast upp á krónu þegar hann hefði selt milljón hluti sem hann skráði sig fyrir í útboðinu með 10 króna hagnaði á hlut strax „við fyrsta hanagal“ morguninn eftir. Nánar tiltekið hafi hann selt á genginu 127, en dagslokagengi daginn áður hafði verið 122, og útboðsgengið 117.
„Alls voru tæplega 1,6 milljónir hluta seldir í Íslandsbanka á um eða yfir 127 krónur á hlut í 81 viðskiptum umræddan dag, þann 23. mars, samkvæmt viðskiptayfirliti Kauphallarinnar. Fjöldi seldra hluta á því verði náði hins vegar ekki milljón fyrr en um hádegisbil, og stærstu einstöku viðskiptin hljóðuðu upp á 481 þúsund hluti sem seldar voru á genginu 126,8 eða 61 milljón króna,“ segir í frétt Viðskiptablaðsins.
„Sé viðskiptunum skipt upp eftir fjármálastofnun seljanda þrengist leitin enn frekar, en viðmælendur Viðskiptablaðsins á fjármálamarkaði segja óhætt að fullyrða að seljandinn í sögu Páls hefði selt í gegn um sama aðila þó um mörg viðskipti kynni að vera að ræða. Megnið af seldum bréfum á áðurnefndu verðbili komu frá Arion banka, alls tæplega 1,1 milljón hluta.“
„Með því að púsla saman 5 stórum sölum Arion á umræddu gengisbili er hægt að ná upp í rétt ríflega milljón hluti, sem ekki er útilokað að hafi allt verið sami söluaðili og myndi stemma við sölugengið í sögu Páls. Meirihluti þeirra viðskipta átti sér hinsvegar ekki stað fyrr en í hádeginu,“ segir þar enn fremur.
Sé tímaramma sögu Páls gefið svigrúm til hádegis er því ekki hægt að útiloka að hún standist að öðru leyti, en kunninginn hefði þá staðið undir meirihluta seldra hluta á áðurnefndu verðbili þann daginn. Bréfin sem hann seldi hefðu ennfremur ekki getað verið þau sem hann skráði sig fyrir í útboðinu, og hefði hann því þurft að eiga seldu hlutina milljón fyrir útboðið. Þess má að lokum geta að gangvirði bréfanna fór ekki yfir 125 krónur á hlut aftur það sem eftir lifði útboðsvikunnar.
