Yfirvöld í Wales í Bretlandi segja til greina koma að karlmenn verði settir í tímabundið útgöngubann frá klukkan sex að kvöldi á svæðum þar sem konur hafa ítrekað lýst yfir miklu óöryggi sínu á kvöldin. Þetta segir Mark Drakeford, ráðherra landsins.
Frá þessu er greint á vef breska götublaðsins The Sun. Þar segir að tillaga um slíkt hafi verið lögð fram í opinberri umræðu af Baroness Jones, þingkonu Græningja. Segir Drakeford að ekki sé hægt að útiloka tillöguna alfarið, en það sé ekki í forgangi nema í alvarlegri „krísu.“
Hugmyndina að tillögunni fékk þingkonan í kjölfar morðsins á Söru Everard. Ekkert hefur spurst til Söruh frá því hún yfirgaf heimili vinar síns miðvikudagskvöldið 3. mars í Clapham í suðurhluta Lundúna. Everard, sem er 33 ára markaðsstjóri frá York, var klædd í grænan regnjakka, dökkbláar buxur með hvítu demantamunstri og túrkís- og appelsínugula íþróttaskó þegar hún hvarf. Lögreglumaður og kona á þrítugsaldri sitja í varðhaldi vegna málsins en lögregla hefur varist allra frétta.
Konur ættu ekki að þurfa að breyta hegðun sinni
Breska götublaðið hefur eftir Baroness Jones að hugmynd hennar sé ekki sett fram af alvöru, heldur frekar sem hugvekja. „Ég held að þetta myndi gera konur mun öruggari með sig og allskonar ógnum myndi fækka,“ segir hún.
Hún segir að það ættu ekki að vera konur sem þurfa að breyta hegðun sinni af öryggisástæðum í kjölfar morðsins á Söru. „Ef einhverjum ætti að vera ráðlagt að vera heima, ættu það að vera karlmenn en ekki konur,“ segir hún.
„Svona morð eru sjaldgæf en mjög ógnvekjandi. Það sem er algengara eru kynferðislega áreitnin, hótanirnar, köllin og dónalegu orðskiptin sem konur upplifa á hverjum degi,“ segir hún.
„Myndi lögreglan sinna starfi sínu myndi þessi menning kvenhaturs ekki þrífast. Menn myndu ekki gera ráð fyrir því að komast upp með þetta. Lögreglan hefur ekki staðið sig í kynferðisbrotamálum í áraraðir. Þau hafa að mestu klúðrað málunum þegar kemur að heimilisofbeldi. Lögreglan þarf að snúa þessu við og venda konur eins og þær eiga skilið.“
