Þorsteinn Pálsson, fyrrverandi forsætisráðherra og formaður Sjálfstæðisflokksins, segir ljóst að flokkurinn ætli sér að færa sig nær Miðflokknum í andstöðu sinni við EES samninginn.
Þetta kemur fram í pistli Þorsteins sem birtist í Fréttablaði dagsins. Þar bendir Þorsteinn á að Vilhjálmi Bjarnasyni, fyrrverandi alþingismanni, hafi verið skipt út í 5. sæti í Suðvesturkjördæmi fyrir Arnar Þór Jónsson, héraðsdómara.
Arnar Þór fór mikinn í baráttu sinni gegn þriðja orkupakkanum á sínum tíma. „Sjálfstæðismenn í suðvesturkjördæmi ákváðu nýlega að setja í baráttusæti á lista sínum í þessu sterkasta vígi flokksins einn helsta andófsmann EES-samningsins, sem auk þess var aðal hugmyndafræðingurinn í andstöðunni við þriðja orkupakkann. Áður skipaði þetta sæti talsmaður frjálslyndra viðhorfa í flokknum.“
Þorsteinn segir þetta skýr skilaboð um að Sjálfstæðisflokkurinn muni leggja aukna áherslu á andóf sitt gegn EES og færa sig nær Miðflokknum. „Vinni flokkurinn sætið má reikna með fleiri uppákomum við innleiðingu reglna á grundvelli EES-samningsins. Verði báðir flokkarnir í næstu ríkisstjórn er eins líklegt að endurskoðun samningsins um Evrópska efnahagssvæðið verði hafin.“
Pistill Þorsteins á vef Fréttablaðsins.
