Erlingur Sigvaldason forseti Uppreisnar ungliðahreyfingar Viðreisnar skýtur föstum skotum á Samfylkinguna og segir flokkinn hafa misst kjarkinn í Evrópumálum.
Hann segir áhuga fólks á því að hefja aðildarviðræður við Evrópusambandið sjaldan hafa verið jafn mikinn og núna, það sýni könnun eftir könnun.
„Það er því furðulegt að á landsfundi Samfylkingarinnar um helgina kvað við nýjan tón í flokknum. Aðild Íslands að Evrópusambandinu er ekki lengur á dagskrá hjá flokknum og þar með fækkaði valkostum evrópusinna í kjörklefanum,“ skrifar Erlingur í aðsendi grein á Vísi.
Hann segir Samfylkinguna hafa verið hugrökk á sínum tíma þegar flokkurinn sótti um aðild og að það sé miður að flokkurinn hafi týnt kjarkinum og vilji núna fela stefnumálið á blaðsíðu 62 af 64.
„Í stefnuræðu sinni sagðist Kristrún að ekki væri hægt að þylja upp gömlu rökin heldur að hefja þyrfti að nýju rannsókn á kostum og göllum aðildar. Þar hefur Kristrún alveg rétt fyrir sér að umræðan þarf að vera lifandi og ekki byggð á gögnum sem eru áratuga gömul, en það sem Kristrún ávarpar ekki í ræðu sinni er það hvernig Samfylkingin ætlar að byrja þetta nýja samtal. Samfylkingin virðist því sópa þessu mikilvæga máli til hliðar.“
Erlingur segir Viðreisn eina flokkinn sem hafi sett aðild Íslands að ESB í forgang. Um sé að ræða eitt stærsta hagsmunamál þjóðarinnar.
„Þótt Evrópusambandið sé engin töfralausn fyrir Ísland þá er það mikilvægt skref í átt að því að byggja betra samfélag. Baráttan fyrir aðild vinnst ekki á því að sleppa því að taka umræðuna heldur vinnst hún á því að flokkar með mismunandi hugmyndafræði taki höndum saman og tali fyrir henni af sannfæringu og rökfestu.“
Hann segir sig og félaga sína í Viðreisn halda umræðunni ótrauð áfram. „Með von um að Samfylkingin fari að taka samtalið, sem þeim greinilega hefur vantað, um kostina sem því fylgja að Ísland gangi í Evrópusambandið.“
