„Fréttirnar eru einfaldlega þær að það eru engar endanlegar fréttir enn sem komið er,“ segir Drífa Björk Linnet, en hún segir frá því á Instagram reikningi sínum hvernig andlát eiginmanns hennar á Tenerife bar að fyrr á árinu.
Það var þann 6. febrúar þegar fjölskyldan vaknar við að það sé kominn upp eldur í húsi þeirra á Tenerife. „Eftir að Sara Jasmín elsta dóttir mín vaknar og hleypur í panikki út og nánast inn í eldinn – kallar hún á mig að það sé kviknað í,“ segir Drífa.
Drífa hringir því í slökkvilið og lögreglu sem ná að ráða niðurlögum eldsins. „Þegar það er búið, koma þeir til mín og segjast hafa fundið manninn minn í einni af tveimur bifreiðum í bílskúrnum og hafi hann strax verið úrskurðaður látinn,“ segir hún.
Því næst fer hún upp á lögreglustöð þar sem skýrsla er tekin af fjölskyldunni og þaðan fer hún að leita að hótelherbergi. Enda var húsið óíbúðarhæft og bílarnir ónýtir.
„Á meðan ég er að reyna að finna hótel, vissu börnin ekkert og spurðu í sífellu hvort ég ætlaði ekki að hringja í pabba þeirra og segja honum að það hafi kviknað í. Eftir að ég er búin að innrita mig á hótelið segi ég börnunum fréttirnar um að pabbi þeirra sé dáinn,“ segir Drífa.
Skýrslan var í töluverðan tíma á borði dómara. En dómari þurfti að samþykkja hana áður en málið færi lengra. Ef dómarinn hafnaði skýrslunni þyrfti að rannsaka málið betur.
Á næstu þremur mánuðum eyddi fjölskyldan tímanum á hóteli, ásamt móður Drífu. Drífa pressaði á Spænsk yfirvöld um það hvað hefði gerst og hvenær hún gæti jarðað mann sinn.
Það var síðan eftir þessa þrjá mánuði sem Drífa fékk nóg og flutti til Íslands. „Að þessum 3 mánuðum loknum var ég komin með nokkurn vegin mynd á hvað hefði gerst þessa nótt en þó ekki komin með fullnægjandi svör hvort ég mætti taka hann með mér og því gat ég ekki gert börnunum það lengur að búa við þessar aðstæður og ákveð að bóka okkur til Íslands.“
Andlát manns Drífu var ekki sjálfsvíg og bar ekki að með saknæmum hætti. Það var staðfest tveimur vikum eftir andlátið.
Ekki enn vitað hvernig eldurinn kviknaði
„Svo nú er verið að rannsaka upptök eldsins. Hvaðan kom eldurinn ef Halli kveikti ekki í sjálfur, né einhver annar? Getur það verið vindill eða ofhitnaði bíllinn? Þeir eru einfaldlega ekki búnir enn að átta sig á því og því er málið enn til rannsóknar,“ segir Drífa.
„Öryggismyndavélar voru skoðaðar bæði sem eru alls staðar á húsinu okkar og í götunni okkar og þar sést mjög greinilega að Halli kom einn heim seint um nóttina, lyklalaus og vildi sennilega ekki vekja okkur og hann sest inn í bíl, ræsir vélina, kemur sér fyrir í sætinu og leggur sig.“
Tuttugu mínútum síðar fer hann aftur að húsinu, en snýr aftur að bílnum og sofnar þar. Tveimur klukkustundum síðar kemur reykur frá bílnum og síðan sprenging. „Þá vöknum við öll og martröðin hefst sem við erum enn í,“ segir Drífa.
Drífa hefur verið í sambandi við fjöldann allan af lögfræðingum. Hún segir alla vera að gera sit besta og að allir séu að reyna að flýta fyrir málinu. „„Svörin eru bara „þetta tekur tíma“ ég hef ekki geta sætt mig við það en núna er svo komið að ég verð geðheilsu minnar og barnanna vegna að sætta mig við það svar og bíða bara,“ segir hún.
Drífa hefur ekki enn fengið jarðneskar leifar eiginmannsins. „Svörin eru bara „þetta tekur tíma“ ég hef ekki geta sætt mig við það en núna er svo komið að ég verð geðheilsu minnar og barnanna vegna að sætta mig við það svar og bíða bara,“ segir hún.
Minningarathöfn verður haldin 23. ágúst næstkomandi en þá hefði Halli orðið fimmtugur.
