Leiðarahöfundur Morgunblaðsins segir eitthvert undarlegt upplausnarástand ríkja í rekstri Reykjavíkurborgar. Leiðarinn er nafnlaus að venju en ætla má að Davíð Oddsson ritstjóri haldi þar á penna.
„Ekki eru margir mánuðir frá því að allt var sagt í himnalagi í rekstrinum og að framundan væru bjartir tímar. Þetta var fyrir kosningar og nú er komið í ljós að reksturinn er afleitur og útlitið mjög slæmt,“ skrifar leiðarahöfundur. '
Þá rifjar hann upp að fyrir örfáum vikum hafi foreldrar leikskólabarna mætt í ráðhúsið. Þá hafi borist sú skýring að mikill skortur væri á leikskólakennurum og að við því gæti borgin lítið gert.
„Nýjustu tíðindi frá meirihlutanum í borginni eru þau að leikskólakennarar séu allt of margir og að ætlunin sé að fækka þeim. Nú eru leikskólar yfirmannaðir, fyrir skömmu vantaði sárlega starfsfólk á leikskólana.“
Þá skrifar Davíð að það hafi ekki verið sannfærandi að meirihlutinn skuli í óðagoti síðastliðinn fimmtudag hafa lagt fyrir borgarráð tillögu um meira en þriggja milljarða króna lántöku og hafi neitað að fresta afgreiðslunni til að minnihlutinn fengi tækifæri til að kynna sér hana.
„Það rifjar raunar upp fleiri atvik af sama tagi þar sem meirihlutinn í borginni afgreiðir stór mál viðskiptalegs eðlis með leynd og felur upplýsingar í lokuðum herbergjum sem enginn má fara inn í nema bundinn trúnaði þannig að borgarbúar fái sem minnstar upplýsingar,“ skrifar Davíð.
„En þegar rekstur borgarinnar er kominn í þær ógöngur sem raun ber vitni og hringlandahátturinn slíkur að upplýsingagjöfin er endurskoðuð og snúið algerlega á haus á fáeinum vikum, þá er meira en tímabært að bæta upplýsingagjöfina þannig að borgarbúar geti kynnt sér allt sem að baki býr og myndað sér skoðun á ástandinu í stað þess að þurfa aðeins að treysta á spunameistara meirihlutans og þær „upplýsingar“ sem þeir kjósa að veita hverju sinni.“
