Jens Lundgren, prófessor í bóluefnafræðum og leiðandi vísindamaður Danmerkur, segir að bóluefni AstraZeneca valdi nýjum sjúkdómi sem ber nafnið VITT. Sá sjúkdómur hafi valdið mörgum af þeim banvænu blóðtöppum sem fengið hafa Dani til að hætta alfarið notkun bóluefnisins.
Þetta hefur Fréttablaðið eftir Lundgren sem ræddi málin í samtali við TV2 sjónvarpsstöðina. Eins og fram hefur komið ákváðu Danir í gær að hætta alfarið notkun bóluefnis AstraZeneca.
„Nýr sjúkdómur hefur verið staðfestur og skilgreindur og nú vitum við að það er bóluefnið sem veldur þessum sjúkdómi,“ segir Lundgren við TV2. Því hafi það verið rétt ákvörðun hjá Dönum að hætta notkun efnisins.
Nýi sjúkdómurinn kallast VITT og heilbrigðisyfirvöld í Danmörku telja einn af hverjum fjörtíu þúsundum í hættu. Sagt er að þýskt rannsóknarteymi hafi þann 9. apríl síðastliðinn sannað samhengi milli AstraZeneca bóluefnisins og VITT og greint frá því í hinu viðurkennda riti New England Journal of Medicine.
Í frétt TV2 kemur fram að sjúkdómurinn kvikni þegar sá bólusetti myndi ekki aðeins mótefni gegn COVID-19 heldur líka gegn blóðflögum sem kallast trombocytter. Blóðflögurnar stýri storknunareiginleikum blóðsins.
„Þetta er einfaldlega komin ný sjúkdómsgreining, nýr sjúkdómur, nýtt flækjustig í læknabækurnar,“ sagði Søren Brostrøm, forstjóri heilbrigðisstofnunarinnar í Danmörku á blaðamannafundi í gær.
