Sauð upp úr í gær: „Fólki er nóg boðið vegna fram­komu hennar“ – Vig­dís hótar lög­sókn

Tals­verður hiti var á fundi borgar­ráðs í gær eftir að Helga Björg Ragnars­dóttir, skrif­stofu­stjóri borgar­stjóra og borgar­ritara, tók sæti á fundinum með fjar­fundar­búnaði. Vig­dís Hauks­dóttir, borgar­full­trúi Mið­flokksins, gerði al­var­legar at­huga­semdir við það.

Grunnt hefur verið á því góða milli Vig­dísar og Helgu og hefur sú síðar­nefnda sakað Vig­dísi um ein­elti. Á fundinum í gær sauð upp úr milli Vig­dísar og full­trúa meiri­hlutans. Gengu á­sakanir á víxl og virtist Vig­dís fá að lokum nóg þegar hún sagðist í­huga að leita réttar síns vegna um­mæla sem finna mátti í bókunum meiri­hlutans.

Sagði áreitið halda áfram

Eftir að Helga tók sæti lagði Vig­dís fram eftir­farandi bókun:

„Það er vald­níðsla af for­manni borgar­ráðs, Þór­dísi Lóu Þór­halls­dóttur, að hleypa skrif­stofu­stjóra borgar­stjóra, Dags B. Eggerts­sonar, Helgu Björg Ragnars­dóttur inn á fundi þar sem ég, rétt­kjörin borgar­full­trúi Mið­flokksins, hef skyldu­setu sam­kvæmt lögum,“ sagði Vig­dís í bókun sinni.

Hún sagði svo að í þrí­gang hefði frið­helgi hennar á eigin heimili verið brotin að kvöldi til þegar á­byrgðar­póstur barst henni með grófum á­sökunum um ein­elti af hálfu Vig­dísar gegn Helgu.

„Á­reitið gegn mér heldur á­fram með sam­þykki formanns borgar­ráðs, borgar­stjóra og meiri­hlutans með því að hleypa þessari konu á fundi þar sem ég er. Sam­kvæmt á­sökunum sem bornar hafa verið á mig á þessi kona að forðast mig en ekki sækja í að vera þar sem ég er. Ég mót­mæli setu hennar í hvert einasta sinn sem hún mætir á fundi til að verjast á­reiti hennar en for­maður borgar­ráðs hefur það að engu. Mitt eina úr­ræði er því að snúa baki við skrif­stofu­stjóra Dags B. Eggerts­sonar, borgar­stjóra, til að forðast á­fram­haldandi á­reiti hennar í minn garð.“

Sögðu Vigdísi þekkta fyrir árásir á starfsfólk

Full­trúar Sam­fylkingar, Við­reisnar, Pírata og Vinstri grænna lögðu þá fram gagn­bókun þar sem bent var á að skrif­stofu­stjórum með mál fyrir borgar­ráði væri skylt að fylgja málum sínum eftir. Það hafi ekkert með borgar­full­trúa Mið­flokksins að gera.

„Á­fram heldur borgar­full­trúinn á­rásum sínum á starfs­fólk sem hann er orðinn þekktur fyrir bæði hjá ríki og borg. Fram­koma borgar­full­trúa er honum til minnkunar og betur færi á því að borgar­full­trúinn sinnti skyldu sinni og stæði vörð um hag Reykja­víkur­borgar frekar en að vinna að því að grafa undan inn­viðum borgarinnar,“ sagði meiri­hlutinn.

Taka þátt í eineltinu

Vig­dís var ekki sátt við þessa bókun og lagði fram gagn­bókun þar sem hún sagði að fram kæmu að­dróttanir og al­hæfingar sem væru úr lausu lofti gripnar. Máli sínu til stuðnings hafi þau vísað til vinnu hennar á Al­þingi án þess að hafa nokkrar stað­festingar máli sínu til stuðnings.

„Með þessum mál­flutningi kvittar meiri­hlutinn upp á að taka þátt í ein­eltis­menningu ráð­hússins. For­maður borgar­ráðs sem stýrir fundinum gerir ekki at­huga­semdir við þessar á­rásir sem kjörinn full­trúi situr undir, en á samt að vinna jafnt fyrir alla borgar­full­trúa og gæta jafn­ræðis og sann­girni,“ sagði Vig­dís.

„Fólki er nóg boðið“

Í gagn­bókun sögðu borgar­ráðs­full­trúar meiri­hlutans að þegar Vig­dís gegndi hlut­verki formanns fjár­laga­nefndar hefðu borist ýmsar kvartanir um hegðun hennar gagn­vart starfs­fólki og em­bættis­mönnum.

„Form­legar kvartanir bárust m.a. fjár­mála­ráðu­neytinu og for­seta Al­þingis um stað­hæfingar og orð sem hún hefur látið falla í við­tölum. Fólk hefur einnig kvartað yfir ó­kur­teisi hennar á fundum sem hún stýrir, m.a. Páll Matthías­son for­stjóri Land­spítalans og fleiri. Það þarf ekki að leita langt en um hegðun Vig­dísar Hauks­dóttur er fjallað í fjöl­miðlum því fólki er nóg boðið vegna fram­komu hennar,“ sagði í bókuninni en þar var einnig bent á frétt RÚV frá árinu 2016 þar sem fjallað var um um­mæli hennar um em­bættis­menn hjá Ríkis­endur­skoðun og fjár­mála­ráðu­neytinu.

„Óbærilegur eineltiskúltúr“

Vig­dís virtist fá alveg nóg eftir þessa bókun meiri­hlutans og hótaði raunar að leita réttar síns.

„Í sam­ráði við lög­mann verður vart hjá því komist lengur að ég leiti réttar míns til að hreinsa æru mína af þeim á­virðingum sem á mig eru bornar af borgar­full­trúum meiri­hlutans í borgar­stjórn. Sá ein­eltiskúltúr sem ríkir í ráð­húsinu og ríkt hefur lengi er ó­bæri­legur og er farinn að taka á sig al­var­legar myndir. Hér hafa full­trúar meiri­hlutans á þessum fundi gengið lengra en nokkru sinni fyrr og rótað upp róg­burði fjöl­miðla í fyrri störfum mínum. Full­trúar meiri­hlutans bera á­byrgð á orðum sínum og um­mæli og vinnu­brögð þeirra dæma sig sjálf. Þessi hegðun meiri­hlutans er dæmi­gerð fyrir þá með­virkni sem ríkir um ein­eltiskúltúr ráð­hússins sem ríkt hefur þar um ára­bil.“