Kári Friðriksson, leigubílstjóri og tónlistarmaður, segist sár yfir ummælum grínistanna Péturs Jóhanns Sigfússonar og Sverris Þórs Sverrissonar, eða Sveppa, í hlaðvarpi þeirra félaga Beint í bílinn.
Í samtali við mbl.is í dag segir Kári að ummæli þeirra félaga í hlaðvarpinu, þar sem þeir gera grín að vaxtarlagi leigubílstjóra sem þeir sjá, vera beint að sér. Ummælin séu ósmekkleg og lýsi fitufordómum.
„Þetta eru tíu mínútur af gríni um það hvað ég er feitur. Þetta er ákaflega ósmekklegt,“ hefur mbl.is eftir Kára.
„Mér finnst þetta ómerkileg framkoma. Mér var sagt að þessir menn hafi báðir lent í einelti áður. Þeir hafa nú ekki lært mikið af því.“
„Eins og einhver selur“
Ummælin sem um ræðir létu þeir félagar falla í þætti númer 21 af hlaðvarpinu. Í þáttunum setjast þeir saman upp í bíl, fara á rúntinn og taka upp spjall sitt á meðan. Í umræddum þætti keyra þeir niður Hverfisgötu og minnast svo á leigubílstjóra sem þeir mætt skömmu áður.
„Ef þú horfir ofan á þennan leigubílstjóra er hann örugglega fermetri,“ segir Sveppi í hlaðvarpinu og Pétur Jóhann tekur undir með honum.
„Hann er allur svona kringlóttur,“ heldur Sveppi áfram. „Ef þú myndir leggja hann niður væri hann eins og einhver selur.“
