Samtök um líkamsvirðingu hafa svarað Kára Stefánssyni, forstjóra Íslenskrar erfðagreiningar, og segja honum að rannsóknir sýni að megrunarlyf valdi alvarlegum aukaverkunum.
„Sýnir saga megrunarlyfja okkur að inngrip af þessu tagi koma ekki til með að vera meðferðarúrræði til lengri tíma fyrir þorra fólks. Orðræða Kára lýsir í raun ótrúlega vel þeim samfélagslegu viðhorfum sem eru ríkjandi í nútímanum. Það er að segja, við samþykkjum fitufordóma undir þeim formerkjum að við séum að bæta heilsu, í stað þess að við séum í raun að jaðarsetja fólk. Jaðarsetning sem leiðir til verra heilsufars,“ segir í yfirlýsingu samtaka um líkamsvirðingu.
Kári fagnaði því í Fréttablaðinu í gær að notkun á megrunarlyfjum hefur tífaldast hér á landi. Hann sagði Samtök um líkamsvirðingu úti í mýri í umræðunni um lyfin og segir offitu stærsta heilbrigðisvandamál samtímans.
„Þetta er alveg furðulegt viðtal í Fréttablaðinu því að það ber öllum saman um að offita sé mesta heilbrigðisvandamál í vestrænum samfélögum,“ sagði Kári um viðtal blaðsins við Vilborgu Kolbrúnu Vilmundardóttur, næringarfræðing og stjórnarkonu í Samtökum um líkamsvirðingu.
„Offitu fylgir gífurlega aukin hætta á hjartabilun, lifrarskemmdum, sykursýki fullorðinna, kæfisvefni, slitgigt hjá ungu fólki og allskonar krabbameinum. Það sem meira er að það er bókstaflega línulegt samband milli offitunnar og þeirra mælikvarða sem eru notaðir á offitu og hættunnar af þessum sjúkdómum. Þannig það fylgir þessu gífurleg áhætta,“ bætti Kári við.
„Gjörsamlega út í mýri“
Kári sagði jafnframt að búið væri að sýna fram á með eð hjáveituaðgerðum að það að léttast auki lífslíkur. „Það er bókstaflega búið að sýna fram á að það fólk sem hefur komist burt úr þessari offitu með róttækum aðgerðum, að það lengir líf umtalsvert,“ segir Kári.
„Þannig að þessar staðhæfingar hjá stjórnarmeðlimnum, hún segist hafa fylgst vel með en ég veit ekki hvað hún hefur lesið, því hún er alveg gjörsamlega út í mýri þegar að þessu kemur.“
