Lögmaður Samherja hefur lagt fram kæru fyrir siðanefnd Ríkisútvarpsins á hendur ellefu frétta- og dagskrárgerðarmönnum RÚV. Þetta kemur fram á vef Samherja en þar segir að ástæðan sé „þátttaka þeirra í þjóðfélagsumræðu“ um málefni Samherja á samfélagsmiðlum.
Í tilkynningu Samherja er vísað í siðareglur Ríkisútvarpsins þar sem segir:
„Starfsfólk, sem sinnir umfjöllun um fréttir, fréttatengt efni og dagskrárgerð tekur ekki opinberlega afstöðu í umræðu um pólitísk málefni eða umdeild mál í þjóðfélagsumræðunni, þ. á m. á samfélagsmiðlum.“
Á vef Samherja segir:
„Öll þau tilvik sem fjallað er um í kærunni varða starfsmenn Ríkisútvarpsins sem sinna umfjöllun um fréttir, fréttatengd efni og dagskrárgerð. Í færslum þeim, sem starfsmennirnir birtu á samfélagsmiðlum og fjallað er um í kærunni, tóku þeir afstöðu í umræðu um málefni Samherja. Er þar einkum um að ræða mál vegna ásakana sem settar voru fram vegna starfseminnar í Namibíu og hið svokallaða Seðlabankamál en einnig ýmis önnur mál sem tengjast Samherja með beinum og óbeinum hætti. Má þar nefna eignarhald fyrirtækja í sjávarútvegi og eignarhald á hlutabréfum í Eimskip.“
Haft er eftir Þorsteini Má Baldvinssyni á vef Samherja að í sumum tilvikum sé um margítrekuð brot að ræða.
„Þá virðist hópur manna, sem starfa við fréttir og dagskrárgerð, hafa haft samantekin ráð um að skaða orðspor Samherja. Af þessu er augljóst á Samherji á engan möguleika á því að fá hlutlausa umfjöllun hjá Ríkisútvarpinu,“ segir Þorsteinn Már Baldvinsson, forstjóri Samherja, í tilkynningunni.
Meðal þeirra sem eru kærðir eru Helgi Seljan, Þóra Arnórsdóttir, Sigmar Guðmundsson, Aðalsteinn Kjartansson, Freyr Gígja Gunnarsson, Lára Ómarsdóttir og Rakel Þorbergsdóttir, fréttastjóri RÚV.
