Sala á íslensku neftóbaki hefur hrunið það sem af er þessu ári, samkvæmt tölum frá Áfengis- og tóbaksverslun ríkisins.
Viðskiptablaðið greinir frá því að fyrstu tíu mánuði þessa árs hafi salan dregist saman um 43%. Þannig höfðu 38,5 tonn af neftóbaki selst fyrstu tíu mánuði ársins í fyrra en það sem af er þessu ári nemur salan 21,6 tonnum.
Miðað við að hver dolla af neftóbaki sé 50 grömm nemur fækkunin 338 þúsund dósum af neftóbaki fyrstu 10 mánuði ársins.
Viðskiptablaðið bendir á að ríkið hafi fengið í sinn hlut um 1,5 milljarð króna í gegnum sölu neftóbaks á síðasta ári en viðbúið er að sú upphæð muni lækka verulega í ár.
Minnkandi eftirspurn eftir íslensku neftóbaki má vafalaust rekja til svokallaðra nikótínpúða sem innihalda ekki tóbak. Púðarnir hafa notið vaxandi vinsælda, sérstaklega meðal ungra íslenskra karla sem nota þá frekar en íslenska ruddann.
Auk þess að innihalda ekki tóbak eru púðarnir talsvert ódýrari en íslenska neftóbakið. Kostar dósin hér á landi yfirleitt um þúsund krónur á meðan íslenska neftóbakið kostar víða vel á fjórða þúsund krónur dósin.
