Myndlistarmaðurinn Snorri Ásmundsson sendi opið bréf til Lilju Alfreðsdóttur, menntamálaráðherra, og kvörtun til umboðsmanns Alþingis vegna meintrar spillingar í launasjóði myndlistarmanna.
Í launasjóði myndlistarmanna í ár sátu Aldís Arnardóttir, formaður, Unnar Örn Jónasson og Sigurður Árni Sigurðsson. Snorri bendir á það að þeir sem sátu í starfslaunanefndinni með Aldísi árið áður hafi báðir fengið listamannalaun í ár.
„Sindri Leifsson sat í starfslaunanefndinni með Aldísi Arnardóttur árið 2020. Nú 2021 er Aldís formaður nefndarinnar og Sindra er veitt hæstu starfslaun í ár. Svo fengu Unnar Örn og Sigurður Árni sem nú eru í nefndinni með Aldísi 12 mánaða starfslaun þegar Sindri Leifsson var í nefndinni í fyrra.“
Snorri telur þetta benda til þess að nefndarmenn séu líklegri til að samþykkja umsóknir þeirra sem áður hafa setið í nefndinni.
Ólíðandi vinnubrögð
„Þessi vinnubrögð eru afar vafasöm, ófagleg og ólíðandi. Nefndinni er auk þess ekki gert að rökstyðja afstöðu sína til umsóknanna og ýtir það en frekar undir vinargreiða og bitlinga,“ ítrekar Snorri.
„Ég óska eftir að menntamálaráðuneytið verði með augun opin svo spilling eigi sér ekki stað.“
