Héraðsdómur Vestfjarða hefur dæmt karlmann, Svein Yngva Valgeirsson, til greiðslu 200 þúsund króna sektar og rúmlega 640 þúsund króna í málskostnað, fyrir að saga niður níu aspir á Flateyri.
Fréttablaðið fjallar um þetta mál í dag en um er að ræða aspir sem voru gróðursettar til minningar um þá sem létust í snjóflóðunum í þorpinu árið 1995.
Í frétt Fréttablaðsins kemur fram að aspirnar hafi staðið við lóð á Drafnargötu þar sem Sveinn bjó. Sagðist hann hafa óskað eftir því að áhaldahúsið á Flateyri gerði eitthvað í sambandi við aspirnar þar sem þær yxu og slægjust í hús hans. Þá væri þak hússins þakið kvoðu.
Úr varð að Sveinn fjarlægði aspirnar sjálfur á eigin kostnað og sagðist hann hafa talið sig vera að gera sveitarfélaginu greiða. Svo var þó ekki og sagðist Matthildur Ása Hauksdóttir, Garðyrkjufulltrúi Ísafjarðarbæjar, aldrei hafa rætt málið við Svein og hann ekki haft samband við hana.
