Sævar Helgi Bragason, ritstjóri Stjörnufræðivefsins og baráttumaður fyrir betri umhverfisvitund, sendir foreldrum, ömmum og öfum áhugaverð skilaboð á Twitter-síðu sinni.
Þar gerir hann helíum-blöðrur að umtalsefni og bendir á að helíum sé takmörkuð auðlind sem þarf að gæta vandlega. Helíum er frumefni, svokölluð eðallofttegund, og gerir það að verkum að blöðrur sem fylltar eru með efninu svífa upp í loftið sé þeim sleppt. Þá vekur það jafnan kátínu þegar glaumgosar anda efninu að sér.
En Sævar Helgi segir mjög mikilvægt að sóa þessu mikilvæga efni enda er það notað í göfugri tilgangi en að fylla blöðrur. Sævar bendir á að helíum sé ómissandi í læknisfræði.
Á netinu má finna ýmsan fróðleik um helíum og er til dæmis bent á að erfitt sé að nálgast efnið þó það sé býsna algengt. Sævar Helgi hvetur fólk til að kaupa ekki helíumblöðrur en vart þarf að taka fram að á morgun er 17. Júní. Sævar Helgi endar færsluna á þessum orðum:
„Blaðran er úr slitsterku plastefni sem sundrast í plastrusl sem brotnar seint og illa niður í umhverfinu og dýr halda að sé fæða.“
Memo til foreldra, ömmu og afa.
— Sævar Helgi Bragason (@saevarhb) June 16, 2020
Kaupum ekki helíumblöðrur.
Helíum er takmörkuð auðlind sem við megum ekki sóa, ómissandi í læknisfræði t.d.
Blaðran er úr slitsterku plastefni sem sundrast í plastrusl sem brotnar seint og illa niður í umhverfinu og dýr halda að sé fæða.
