Níu Íslendingar eru á „svörtum lista“ rússneskra stjórnvalda samkvæmt rússneska utanríkisráðuneytinu. Íslendingunum níu verður ekki hleypt inn til Rússlands samkvæmt tilkynningu en ásamt þeim eru sextán Norðmenn, þrír Grænlendingar og þrír Færeyingar á Svarta listanum.
„Þar sem Ísland, Noregur, danska sjálfstjórnarsvæðið Grænland og Færeyjar hafa tekið þátt í refsiaðgerðum gegn Rússlandi ásamt Evrópusambandinu, sem meðal annars inniheldur haftir á rússneska embættismenn hafa sambærilegar aðgerðir verið teknar gegn níu fulltrúum Íslands, sextán norskum fulltrúum, þremur frá Grænlandi og þremur frá Færeyjum,“ segir í tilkynningu utanríkisráðuneytisins sem birtist á ensku á rússenska miðlinum TASS.
Utanríkisráðuneytið nafngreinir ekki einstaklingana á listanum en tekur fram að þar er að finna Alþingismenn, embættismenn, einstaklinga úr viðskiptalífinu, háskólasamfélaginu og fjölmiðlum ásamt opinberum persónum sem hafa opinberlega talað gegn Rússlandi.
Ísland var sett á lista yfir ríki sem væri óvinveitt gagnvart Rússlandi í byrjun mars fyrir að hafa tekið þátt í refsiaðgerðum gegn Rússlandi eftir að Rússar gerðu innrás inn í Úkraínu í lok febrúar.
