„Við höfum aldrei séð svona tölu í krónum og aurum,“ segir Runólfur Ólafsson, framkvæmdastjóri FÍB, í samtali við Fréttablaðið í dag.
Í blaðinu er greint frá því að eldsneytisverð hafi aldrei verið hærra í sögu þjóðarinnar en einmitt nú. Þannig stóð lítrinn af bensíni í tæpri 321 krónu á þjónustustöð N1 í Reykjavík við Hringbraut í gær. Dýrastur var dropinn í Hrauneyjum, 325.80 krónur. Lægsta almenna verð var að jafnaði 312-314 krónur.
Bent er á það að heimsmarkaðsverð á jarðefnaeldsneyti hafi meira en tvöfaldast á einu ári. Verðbólgan sé að miklu leyti rakin til innrásar Rússa í Úkraínu. Kostnaðarverð á eldsneytislítra er nú á Evrópumarkaði um 146 krónur. Fyrir ári kostaði lítrinn undir 70 krónum.
Þessi þróun kemur sér mjög illa fyrir Íslendinga þar sem skattar slaga upp í 50 prósent af verði hvers lítra. Runólfur segir við Fréttablaðið að ástandið bitni mest á þeim sem búa í dreifbýli og eigi um lengstan veg að fara.
„Krafan er að fá tímabundna niðurfellingu vörugjalds bensíns og lækkun á olíugjaldi. Þetta uppsprengda verð hefur ekki bara áhrif á afkomu fólks og vísitölu heldur margfaldast þetta hressilega út í allt vöruverð,“ segir Runólfur í Fréttablaðinu.
FÍB hefur skorað á stjórnvöld að koma til móts við almenning með skattalækkun. Í fjármálaáætlun er áformuð breyting á sköttum ökutækja, meðal annars vegna orkuskipta. Að sögn Runólfs hefur félagið óskað eftir aðkomu, án árangurs.
