Rögnvaldur Ólafsson, aðstoðaryfirlögregluþjónn hjá Almannavarnadeild ríkislögreglustjóra, kveðst vera mjög duglegur að fara í sund eftir að það varð leyfilegt að nýju. Ítrekað séu þó reglur um hámarksfjölda gesta í heitu pottunum brotnar.
Þetta sagði Rögnvaldur í samtali við RÚV fyrr í kvöld. Hann sagði að í síðustu sundferðum hans hefði hann ekki einu sinni komist í pottinn því hann er alltaf fullur.
Þeir landsmenn sem farið hafa í sund að undanförnu hafa vafalítið tekið eftir því að í heitu pottunum eru stundum fleiri en leyfilegt er. Í þeirri sundlaug sem Rögnvaldur sækir hvað oftast mega ekki vera fleiri en sex samankomnir í heitu pottunum, en að sögn Rögnvaldar eru alltaf fleiri en sex í pottinum.
„…Og stundum sé ég að það eru fleiri þar. En maður sér líka stundum að það er sama fólkið sem er í pottinum meira og minna allan tímann sem maður er í sundi,“ segir hann og bætir við að ósanngjarnt sé að aðrir komist ekki að.
Rögnvaldur hvetur fólk til að fara að reglum, sýna samstöðu og tillitssemi. Það sé ekki sanngjarnt að setja starfsfólk í þá stöðu að vera að skamma fólk fyrir að fylgja ekki settum reglum.
