Framþróun gervigreindar hefur sjaldan verið eins hröð og undanfarin ár, en seint á síðasta ári kom tæknin af krafti í umræðuna þegar ýmis forrit, á borð við ChatGPT og Dall-E 2, voru opnuð almenningi.
Þetta kemur framí frétt Morgunblaðsins í dag en þar er rætt við Róbert Bjarnason framkvæmdastjóri Íbúa ses. sem hyggst halda námskeið um hvernig hægt sé að nýta tæknina í ýmsum tilgangi.
Róbert hefur 30 ára reynslu af notkun gervigreindar í frumkvöðlastarfi. „Þetta eru risastór tauganet, 175 milljarðar tauga í ChatGPT, sem eru þjálfaðar á ofurtölvum,“ segir Róbert í samtali við Morgunblaðið, um forritið.
Hann segir forritið byggja á tauganeti sem kalla mætti „stórt tungumála - módel“, upphaflega þróað af Google fyrir betri þýðingar í túlksforritinu Google Translate.
Róbert segir að slík tauganet hafi orðið betri eftir því sem þau stækkuðu. „Í raun er þetta risastór gervigreindarheili, en mjög einfölduð útgáfa af því hvernig hinn mannlegi heili virkar. Við erum ekkert, held ég, nálægt því að svona verkfæri öðlist einhverja meðvitund en þetta getur gert ótrúlega hluti.“
Þá telur Róbert ekki langt í að fólk geti notað slíkt gervigreindarforrit sem „ofureinkaritara“, sem einfaldi fólki lífið og hjálpi til við skipulag. „Og hugsanlega, á endanum, verðum við komin með þann möguleika fyrir þá sem vilja að vera með aðeins tveggja daga vinnuviku. Ég held að þetta sé bara rétt svo byrjunin. Í raun er þetta algjör bylting,“ segir Róbert.
Hann er þó ekki þeirrar skoðunar að mörg störf muni hverfa á komandi árum með tilkomu tækninnar, enda hafi tækniþróun síðustu hundraða ára alltaf sýnt fram á að þótt sum störf glatist myndist ný störf einnig.
„Ég held að í mestri hættu séu þeir sem tileinka sér ekki gervigreindina og eru í samkeppni við annað fólk sem notast við gervigreind við að aðstoða sig. Að því sögðu held ég að ef eitthvað er muni þessi tækni bara búa til fleiri störf á næstu árum.“
