Róbert Guðfinnsson, athafnamaður á Siglufirði, sendi Erlu Gunnlaugsdóttur, skólastjóra Grunnskóla Fjallabyggðar, bréf þar sem hann bauð skólanum afnot af húsum Sigló hótels á Siglufirði.
Greint er frá þessu á vefnum Trölli.is.
Þetta hefur orðið til þess að unglingastig skólans þarf ekki að sinna námi sínu í fjarnámi eins og flest benti til að yrði raunin eftir hertar samkomutakmarkanir vegna COVID-19.
Trölli hefur eftir Kristbjörgu Eddu Jóhannsdóttur, hótelstjóra Sigló hótels, að það væri gaman að geta hjálpað og þetta væri framlag hótelsins til samfélagsins á þessum erfiðu tímum.
Í frétt Trölla kemur fram að skólinn eða sveitarfélagið þurfi ekki að borga krónu fyrir afnot af húsnæði hótelsins.
