Umdeildur húsgrunnur á sumarhúsalóð á Þingvöllum er orðinn eign ríkisins eftir að fjármálaráðuneytið keypti hann á 35 milljónir króna. Grunnurinn hefur staðið nær óhreyfður frá árinu 2008 en hann stendur á leigulóð sem er í eigu ríkisins.
Fréttablaðið fjallar um málið í dag.
Framkvæmdir við grunninn voru stöðvaðar 3. október 2008 eftir að byggingarstjóri sagði sig frá verkinu. Til stóð að byggja 159 fermetra hús á lóðinni en ekkert varð af því. Grunnurinn var í eigu hjónanna Boga Pálssonar og Sólveigar Láru Magnúsdóttur en fyrir um einu og hálfu ári komst hann í eigu föður Boga, Páls Samúelssonar.
Einar Á. E. Sæmundsson þjóðgarðsvörður segir við Fréttablaðið að sumarbústaður muni ekki rísa á lóðinni og raunar verði ekki fleiri sumarbústaðir byggðir innan þjóðgarðsins. Enn er þó óvíst hvað verður gert við grunninn.
„Viljum við nýta þetta mannvirki og breyta í aðstöðusköpun fyrir þjóðgarðinn eða förum við í mat á því að láta fjarlægja það? Í raun sé ég alveg möguleikann á því að geta nýtt þetta,“ segir Einar í Fréttablaðinu.
