Rifjaði upp skot Davíðs: „Sagan er vopn í sam­tímanum“

Guðni Th. Jóhannes­son rifjaði upp skot Davíðs Odds­sonar í sinn garð úr kosninga­bar­áttunni til for­seta­em­bættisins 2016 þegar Davíð rifjaði upp orð Guðna um þorska­stríðin, í nýjasta þættinum af Draugum for­tíðar.

Í hlað­varps­þættinum, sem er einn sá vin­sælasti hér á landi nú um mundir, fara þeir Baldur Ragnars­son úr sveitinni Skálm­öld og Flosi Þor­geirs­son úr sveitinni HAM yfir margs­kyns fyrir­brigði úr for­tíðinni. Guðni Th. var sér­stakur heiðurs­gestur í auka­þætti sem fór í loftið um helgina, enda sagnfræðingur.

Þar ræddu þre­menningarnir flækju­stig þess að rann­saka söguna, en líkt og al­þjóð veit er Guðni Th. sagn­fræðingur og því á heima­velli. Þar ræddu þeir sér­stak­lega þorska­stríðin í því sam­hengi.

„Hér var ekki á ferð ein­huga þjóð, vægast sagt. Og ekki heldur fullnaðar­sigur, því að það var gefið eftir á ýmsum sviðum,“ sagði Guðni Th. Jóhannes­son um Þorska­stríðin sem áttu sér stað á þó nokkrum árum.

„Sama sagan endur­tekur sig '72, '73, það er hver höndin upp á móti hvor annarri í að­draganda út­færslunnar,“ sagði Guðni. Hann rifjar það upp að Ólafur Jóhannes­son, for­sætis­ráð­herra hafi farið til samninga­gerða í Lundúnum við það til­efni og þá hafi það þótt jaðra við svik.

„Það sem ég er þá sum­sé að nefna hér er að þótt heildar­myndin hafi verið í þessum grófu dráttum; við vorum öll sam­mála um að það þyrfti að færa út, að fram­tíð Ís­lands fælist í því að við hefðum full yfir­ráð yfir þessari auð­lind og nú læt ég öðrum eftir um það hver við erum í þessu sam­hengi, það er bara eitt­hvað sem við ræðum utan Bessa­staða af öðru til­efni. En sum­sé, þetta er full­ein­földuð sýn á það sem gerðist í raun og veru. Mikil rómantík.“

Það var þá sem Flosi rifjaði það upp þegar Davíð Odds­son sakaði Guðna um að hafa dregið úr af­rekum Ís­lendinga í Þorska­stríðunum í kosningabaráttunni árið 2016. Davíð sakaði Guðna meðal annars um að hafa talað niður Þorska­stríðin sem hetju­dáð „þegar hann var að vinna að því að fá Ices­a­ve sam­þykkt.“

„Ég vona að þú fyrir­gefir mér það að rifja það upp að í kosninga­bar­áttunni þá var nú einn and­stæðingur þinn þar fyrrum for­sætis­ráð­herra og mér sýndist hann reyna dá­lítið að nýta sér þetta gegn þér, að láta líta svo út sem að þú hefðir verið að draga dá­lítið úr hetju­dáðum okkar í Þorska­stríðunum,“ segir Flosi þá við Guðna.

„En svo voru nú rifjuð upp um­mæli hans á sínum tíma þar sem hann vildi nú meina að Land­helgis­gæslan hefði ekki átt mjög stóran þátt í þessum sigri, heldur aðal­lega Geir Hall­gríms­son og Sjálf­stæðis­flokkurinn, en það er nú önnur saga.“

Þá svarar Guðni Flosa:

„Jú, þetta er bara gott dæmi um það að sagan er vopn í sam­tímanum. Ekki ætla ég að kveinka mér undan því, enda komst ég hingað,“ segir hann við hlátra­sköll þeirra fé­laga.

„En öllu gamni fylgir nokkur al­vara. Þetta er ekkert sér ís­lenskt fyrir­bæri ef út í það er farið. Og mér finnst mjög gaman, og ég held að við öðlumst betri skilning á þessu ef við horfum til dæmis út fyrir land­steinana, og tökum þá and­stæðinga okkar í land­helgis­deilum og þorska­stríðum, Breta, tökum vin­sæla sýn í Bret­landi á seinni heims­styrj­öld og þá drögum við ekkert úr hetju­dáð til dæmis breskra orrustu­flug­manna sem tóku þátt í orrustunni um Bret­land, og var jafn­vel við ofur­efli að etja, eða þær raunir sem Bretar þurftu að þola í The Blitz eins og þeir kalla það,“ segir hann.

„En ef við tökum undir þær raddir að þarna hafi verið barist um fram­tíð vest­rænnar menningar og þarna og bara þarna hafi úr­slitin ráðist, þá horfum við fram­hjá ansi stóru mhluta seinni heims­styrj­aldar. Og það held ég að sé ekki væn­legt.“