„Undanfarna tvo mánuði og tvo daga hef ég verið án sykurs og hveitis,“ segir Reynir Traustason, ritstjóri Mannlífs.
Reynir, sem er einnig leiðsögumaður hjá Ferðafélagi Íslands, gerði róttækar breytingar á lífsstíl sínum fyrir um tíu árum og hefur hann ekki litið um öxl síðan þá.
Reynir segir á Facebook-síðu sinni að afeitrunin hafi upphaflega átt að standa í mánuð en var framlengd þegar september var á enda. Jafnframt var ákveðið að það yrðu tvær undanþágur í mánuði frá sykurbanninu, en í október var önnur þeirra aðeins nýtt.
Þetta hefur skilað sér hjá Reyni því sykurþörfin var að mestu horfin og þá voru fimm kíló farin.
„Kenningar eru uppi um að það taki 60 daga að venja sig af óþverra á orð við sykur. Mér sýnist það standast. Mig langar ekki í sykraða vöru í dag. Hveitileysið er aðeins meira mál en að snýst um offramboð af vöru sem inniheldur hveiti,“ segir hann.
„Þessu til viðbótar höfum við í bandalaginu tekið upp þann sið að borða aðeins grænmeti í fimm daga í viku. Það átti reyndar að vera trúnaðarmál en ég stenst ekki mátið,“ segir Reynir og bætir við að fyrsta grænmetisvikan hafi gengið fínt framan af en á föstudegi hafi verið komin klígjutilfinning.
„Þessi vika fer vel af stað. Dýrindis Gulrótasúpa að hætti gjaldkerans og melóna í eftirrétt, sló í gegn. Vonandi er sykurfíknin að baki eftir afeitrunina. Reynslan segir mér þó að sykurdjöfullinn liggur í leyni. Sykurfíknin er systir áfengisfíknarinnar. Varðstaðan má aldrei bregðast. Við stefnum á sykursnauð jól.“
