Reynir Traustason, ritstjóri Mannlífs, segir baráttuna við ofþyngd ekki vera auðvelda en hann greindi frá því fyrr í dag að hann hafi ekki borðað síðan á sunnudagskvöld og að fastan hafi reynst honum góð. Hann hefur verið opinskár um baráttu sína á Facebook þar sem hann tjáir sig á einlægan og skemmtilegan hátt.
Í tengslum við glímuna sína við ofþyngd greinir hann frá áhugaverðu atviki á Facebook síðu sinni um ástarpunga. Að hans sögn hefur hann gert undantekningar á því sem hann má ekki borða og segir að þar beri hæst að nefna „hlandgulu ástarpungana í Geirabakaríi í Borgarnesi.“
„Ég hef ákveðið að mér sé heimilt að kaupa og innbyrða tvo slíka í hverri vesturför. Í liðinni viku brá ég mér á æskuslóðirnar til að hitta móður mína, önnur ættmenni og vini,“ segir Reynir í færslunni en hann segir fitu og sykur vera sína verstu veikleika.
Sjá einnig: Reynir hefur ekki borðað í fjóra daga
Þegar Reynir mætti í bakaríið ákvað hann þó að taka tvo ástarpunga til viðbótar fyrir móður sína. „Ég greiddi með ánægju og hélt út í borgfirska vorið og inn í bifreiðina. Ég fékk mér pung í rólegheitunum og ók af stað með þrjá punga í poka,“ segir Reynir og fljótlega fékk hann sér annan þannig eftir stóðu tveir sem hann hafði ætlað að gefa móður sinni.
„Við hlið mér voru gjafapungarnir tveir. Í Bröttubrekku sótti að mér græðgi. Ég hugsaði með mér að mamma þyrfti varla tvo punga, smávaxin konan. Ég skaut höndinni ofan í pokann og beit í punginn. Um það bil sem Dalirnir opnuðust var pungurinn búinn,“ segir Reynir enn fremur.
Þannig stóð eftir einn pungur en freistingin reyndist of mikil fyrir Reyni. „Öðru hvoru gjóaði ég augunum á einmanalegan punginn. Mér varð hugsað til móður minnar. Líklega var hún ekkert fyrir svona punga. Ég mundi ekki til þess úr bernsku minni að hún væri í pungunum. Hún var meira fyrir kleinur,“ segir Reynir og bætir við að hann hafi að lokum ákveðið að borða þann síðasta.
Færslu Reynis í heild sinni má sjá hér fyrir neðan:
