Reynir ó­sáttur við á­kvörðun Moggans um minningar­greinar: „Lifir á dauðanum og Guð­björgu“

Reynir Trausta­son, rit­stjóri Mann­lífs, er ekki parsáttur við á­kvörðun Morgun­blaðsins um að slá skjald­borg um minningar­greinarnar, líkt og því er lýst í frétt Frétta­blaðins um málið. Reynir tjáir sig í sér­stökum pistli og segir Moggann lifa á dauðanum og Guð­björgu Matthías­dóttur, at­hafna­konu. Ritstjóri Kjarnans, Þórður Snær Júlíusson, fagnar ákvörðuninni.

Frétta­blaðið greindi frá því í gær­kvöldiað tekin hefði verið sú á­kvörðun af Mogganum að setja fyrir­vara í blaðið um að ó­heimilt sé að birta efni úr minningar­greinum blaðsins í öðrum miðlum án sam­þykkis. Segir Andrés Magnús­son, full­trúi rit­stjóra blaðsins, að sumum hafi mis­líkað slíkar endur­birtingar og þetta sé við­leitni til að tempra á­hyggjur.

Reynir Trausta­son, rit­stjóri Mann­lífs, miðils sem í­trekað birtir and­láts­fréttir úr minningar­greinunum um látið fólk af handa­hófi og birtir á síðu sinni, segir að til­skipun Moggans sé undar­leg.

„Morgun­blaðið er eitt merkasta fyrir­bæri ís­lenskrar fjöl­miðla­sögu. Blaðið hefur lifað lengur en allir aðrir fjöl­miðlar og lifir enn þrátt fyrir þann auma stimpil að hafa Davíð Odds­son sem rit­stjóra. Lestur blaðsins hefur að vísu hrunið á undan­förnum árum en blaðið lifir á bón­björgum og mörg síðustu ár í öndunar­vél frá Vest­manna­eyjum,“ skrifar Reynir.

Hann bendir á að Guð­björg Matthías­dóttir, at­hafna­kona í Vest­manna­eyjum, hafi dælt milljörðum króna í blaðið til að halda því á lífi.

„En rauði þráðurinn í lífi Moggans er dauðinn. Blaðið hefur haldið úti minningar­greinum sem eru tals­vert lesnar og tryggja að ein­hverju marki til­veru blaðsins. Nú hafa stjórn­endur blaðsins á­kveðið að eigna sér and­láts­orðin. Full­trúi Davíðs Odds­sonar, Andrés Magnús­son, gaf út þá undar­legu til­skipun um að bannað væri að birta úr minningar­greinum nema með sér­stöku leyfi.

Þetta stenst enga skoðun og er einungis ör­væntingar­full til­raun til að halda í það eina lífs­mark sem er að finna utan líf­línunnar frá Vest­manna­eyjum…“

Þórður Snær Júlíusson, ritstjóri Kjarnans, fagnar ákvörðuninni í stuttri færslu á Twitter síðu sinni. „Þetta er gott framtak hjá Morgunblaðinu. Einni ömurlegri matarholu lokað.“

Þetta er gott framtak hjá Morgunblaðinu. Einni ömurlegri matarholu lokað. https://t.co/4uXVK8aXuv

— Þórður S. Júlíusson (@thordursnaer) March 12, 2021