Reynir Traustason, einn reyndasti fjölmiðlamaður landsins, kveðst hafa verið svo heppinn að hafa kynnst fjallgöngumanninum John Snorra Sigurjónssyni á vettvangi Ferðafélags Íslands.
Reynir segir að John Snorri sé einn af okkar fremstu fjallgöngumönnum enda toppað marga hæstu tinda heims. Leit að John Snorra og tveimur félögum hans á næsthæsta fjalli heims, K2, hefur ekki borið árangur en þeirra hefur verið saknað síðan á föstudag.
Það er ekki að ástæðulausu að K2 er talið eitt hættulegasta fjall heims að klífa- ekki síst að vetrarlegi eins og nú. Eins og Reynir bendir á hefur John Snorri unnið marga sigra á fjöllum. Hann kleif K2 að sumarlagi árið 2017 og var einnig fyrsti íslenski karlinn til að komast á topp Manaslu auk þess að hafa klifið Lhotse og Broad Peak.
„Þegar ég var að spá í að fara á Everest fundaði hann með mér og gaf góð ráð. Það vakti strax athygli mína hve hógvær hann var þrátt fyrir alla sína sigra á fjöllum og fús til að miðla af reynslu sinni,“ segir Reynir á Facebook-síðu sinni.
Reynir bætir við að John Snorri hafi svo komið sem leynigestur á Úlfarsfell með gönguhópi Skrefanna vorið 2018. Þar hélt hann tölu á toppnum úr reynslubanka sínum.
„Ég hugsa hlýtt til hans og félaga hans sem mættu örlögum sínum við vonlitlar aðstæður á því mannskæða fjalli, K 2. John Snorri er hógvær hetja sem heiður var að fá að kynnast. Hann er mér ógleymanlegur.“
Í tilkynningu frá fjölskyldu Johns Snorra í morgun kom fram að lítil von væri á því að John fyndist á lífi nú þegar myrkur skellur senn á.
„Ljóst er að þegar myrkur skellur á í fjallinu, um 14:00 að íslenskum tíma, er vonin um að þeir finnist á lífi mjög lítil því aðstæður á fjallinu eru virkilega erfiðar og kuldinn mikill,“ sagði Lína Móey, eiginkona Johns Snorra, í tilkynningunni. Þar kom fram að fjölskyldan væri einnig þakklát fyrir mikinn stuðning og hlýhug frá fjölmörgum aðilum.
