„Íslenska þjóðin er að þyngjast. Þetta á sérstaklega við um ungt fólk sem margt hvert glímir við ofþyngd,“ segir Reynir Traustason, ritstjóri Mannlífs, í pistli á vef Mannlífs.
Þar skrifar Reynir um ofþyngd og offitu og segir hann að við séum að nálgast það ástand sem finna má víða í Bandaríkjunum „þar sem offitusjúklingar eru nánast við hvert fótmál“. Reynir segir þó að á sama tíma og feitum fjölgar á landinu þá aukist fordómar gagnvart þessum hópi.
„Ástæðan fyrir ógöngum okkar er offramboð af sykruðum vörum, hveiti og hverskyns orkudrykkjum. Sykur er eitur sem veldur fíkn ekki síður en áfengi eða dóp. Sykur er líklega dóp feita mannsins,“ segir Reynir og bætir við að þetta framboð hafi leitt til þess stjórnleysis sem veldur því að fjölmargir glíma við takmarkaða hreyfigetu.
Reynir segir raunar að ofneysla á mat og sætindum sé okkar stærsti heilbrigðisvandi og gagnrýnir stjórnvöld fyrir að gera lítið til að takmarka neyslu á óhollustu.
„Tvær meginleiðir eru til þess að bjarga fólki. Önnur er sú að stuðla að aukinni hreyfingu með því að leggja stóraukið fjármagn til samtaka sem stuðla að slíku. Hin er að grípa til aðgerða sem tryggja að fólk nærist á heilsusamlegri fæði,“ segir hann.
Þá segir Reynir að nauðsynlegt sé að takmarka neyslu á sykri og annarri óhollustu með skattlagningu og takmörkun á sykurnotkun. Sykurinn sé eitt versta eitur sem nútímamaðurinn glímir við og hann sé núna að finna í mörgum vinsælum matvælum, mjólkurvörum þar á meðal.
„Sykurskattur er eitt sem kemur fullkomlega til greina. Sá skattstofn ætti þó að verða til þess að lækka verð á hollari vörum eða hvetja fólk til hreyfingar,“ segir Reynir í pistlinum og heldur áfram:
„Stjórnvöld verða að grípa til mótvægisaðgerða til að bjarga offitusjúklingum úr klóm ofáts og sykurs. Þar þarf að skoða málin frá öllum hliðum og horfa langt fram á veginn.“
Pistil Reynis má lesa í heild sinni á vef Mannlífs.
